老公同事屋企打邊爐+蒸氣鍋

 感覺好耐無打邊爐了，琴日老公同幾個好老友嘅同事話打邊爐，我就要返工嘅，放佐工就自己搭車去老公同事葵芳屋企，而老公阿仔阿女同另一同事就去荃灣買海鮮食材同處理海鮮，屋主老婆就買丸類同蔬菜，一路食野一路傾計，玩到12點幾先走，哈哈……返到屋企都1點幾了，嗱嗱林去冲涼訓覺(*^ω^*) 老公同小朋友繼續放假，而我就要返工嘅(*'へ'*)

竹芋粉葛紅蘿蔔粟米栗子豬脷湯，蔥油豬脷，蠔油炒西芹

 早幾日見到街市有竹芋賣，於是買佐3條，見d粉葛都好靚，細細條正常系好嫩，突然想食豬脷，一於一齊買埋返，今日放假就留系屋企煲吓湯，訓吓覺休息吓就算，無必要我系唔想落街的，依家好多時一次過買幾日餸，懶得日日去街市…… 

肉絲炒紅蘿蔔，火腿炒青瓜，煎豬扒

 簡簡單單嘅家常餸菜，越簡單越好味，例如今日炒呢個炒紅蘿蔔絲，簡單咁用蒜頭爆香肉絲跟住放紅蘿蔔絲落去一齊炒至軟身，最後加小小鹽，麻油同芝麻粒落去炒匀即可，好香好好食！

香芋臘味糯米飯

 🍂🍂秋風起又系時候吃臘味喇😬今日整返一煲香芋臘味糯米飯食下先，一開飯煲盖就閒到香噴噴芋頭香味同臘味嘅香味味~ 有味飯真系好好食，臘味其實好隨意的，你喜歡咩臘味都可以放落去，我今次放臘鴨脾，瑶桂臘腸，香芋，粘米與糯米系2比1，糯米唔需要浸嘅，直接煲，同平時煮飯一樣，只系煮佐一半時間就放材料落去繼續煮到飯煲好，最後加小小煲仔飯豉油落去撈勻即可以食！

煙肉腸仔蘑菇香蒜芝士白汁意粉

放假煮返個意粉食吓先，我喜歡買金寶呢d罐頭濃縮白汁黎煮嘅，佢有好幾款味道的，整體都唔錯，我最鐘意買芝士白汁，佢簡單方便快捷之餘又好味，真系好正！

藍苺香蕉鬆餅，乳酪朱古力鬆餅

同一星期出現2個颱風🌀🌀⚡🌧🌩颱風【獅子山】完佐之後跟手又黎一個颱風【圓規】，勁呀～ 🤔幾時黎個榴槤颱風呢？ 哈哈……

打風唔好周圍去，最好留系屋企整吓野食睇下電視訓下覺，咁就最好喇，😁今次整鬆餅唔洗打蛋器好方便嘅，全部野撈匀就搞掟，就系咁簡單😆預熱焗爐先，再200度焗15~20分鐘(視乎焗爐溫度而定)💥撈粉時記得輕力撈到無乾粉即可以👩‍🍳過度用力撈d粉會起麵筋到時個鬆餅就唔鬆軟架👌，😅今次無特定份量，我憑感覺🤣 亂咁黎，我幾驚失敗…點知又成功佐😅😛份量一包熱香餅粉，2小匙羹泡打粉，2只蛋，小小粟米油，3條香蕉壓成蓉，3份1盒奶，小小黄糖，藍梅乾適量 (其實可以唔加黄糖都可以)