臘味煲仔飯，南北杏西洋菜排骨湯

好耐無寫blog喇，趁得閒就上黎寫吓野先，嘻嘻…呢排真系忙，忙返工忙照顧家庭等等，總之就系忙喇~ 我做兼職唔覺唔覺已經有半年了，依家已習慣佐返工模式了，朝早凑完返學就返工，好在有老公接放學，咁我就唔洗咁辛苦! 兼職最好就系可以揀日子返，我系逢星期六日都唔返工嘅，哈哈~ 假期更系留系屋企陪老公同小朋友同喇!

星期六同兩姐弟行街見到呢個煲仔覺得好正，我一於買佐返屋企，見雪櫃有臘味於是乎琴晚就煮煲仔飯食，正!!! 放假當然唔少得煲吓湯飲喇，簡單咁煲佐一個南北杏西洋菜排骨湯大家一齊飲，如果有埋鴨腎就更加正，可惜我無買，哈哈~ 

豉椒肉碎豆乾炒酸豆角

結婚咁耐以來我第一次買酸豆角煮黎食，平時亦很小會食，系我系街買嘅酸辣薯粉先有機食到，我見酸酸地幾好食，於是試系街巿買一包黎試吓，味道幾好唔太酸，我拎佢黎炒肉碎同豆腐乾，我為佐更加好味，我仲加什小小豆豉落去一齊炒😁呢個餸用黎送飯或者跟麵一斉食真系一流!我返工帶飯都好喜歡帶呢個餸，嘻嘻!!!

遊船河

放假放埋今日呢個暑假就完滿結束了，時間過得真系快，眨吓眼兩姐弟天日又話要返學囉，趁返學前一於要玩盡佢，老公早幾日帶我地同佢d朋友一齊去遊船河，遊船河當日(28號)天氣都一般，因颱風帕卡嘅影響，個日都落佐好耐雨，好在我地落海玩水果時停雨，落海玩都玩佐成2個鐘，玩完上返船隨即又落雨，哈哈! 個天對我地真系唔錯停雨俾我地落海盡情咁玩 ! 兩姐弟第一次遊船河超興奮，整個行程兩姐弟最開心就系落海玩水，哈哈~ 遊船河我地整佐鮮茄肉醬意粉，其他朋友整雞翼，豬扒，糖水，沙律，小食等等……最後d食物都食唔晒，要每人拎d返屋企😄

蝦醬餐肉雜菜蛋炒飯，冬菇昆布蜆肉湯，花生海蒂綠豆沙糖水

琴日掛10號颱風，隻【天鴿】攪到我無得返工，又揾少幾百蚊~ 見得閒無事做就煲吓糖水食打發吓時間，打風更系唔去買餸喇，系無買餸嘅情況下當然系去雪櫃揾野煮，餸就無麥，見冰箱仲有雜菜，下格有一大碟冷飯，唔洗諗一於炒飯食就算，煲糖水時浸多佐昆布，所以拎想一半用黎滾一個簡單嘅昆布湯!

豉油皇洋蔥雞，咸蛋節瓜湯

好耐無買新鮮雞黎食喇，我平時多數買冰鮮雞食嘅，早幾日老公朋友幫手買佐一隻返黎，老公話80蚊一隻，我即 " 吓 " 佐一聲，新鮮雞喎……邊會咁平呀？佢話系，真系80蚊，佢同事話系深水埗買，真系平到我唔信，我心諗系咪冰鮮黎架，哈哈~ 試食完真糸覺得唔錯，系新鮮雞來的，肉質系鮮甜得黎而且d肉系有韌性嘅，而冰鮮雞d肉系好腍好鬆散嘅，所以80蚊就有一隻新鮮雞真糸好抵食!

南韓之旅@何氏家族

自從返兼職後就少佐好多時間寫blog，我真系好耐無上黎寫野了，趁今日有d時間一於同大家分享吓近況!! 月頭我地何氏大家庭一家大細共13人一齊去南韓【釜山＆濟州】旅行，因老爺今年60歲大壽，佢同奶奶從末坐過飛機出國玩，所以老公同佢家姐阿哥商討一齊請老爺奶奶出國去玩，以全家總動員一齊起行，因有老人家同小朋友都多所以是次旅行系以觀光為主，今次南韓旅行行程相當唔錯，睇到好多好靚嘅大自然風景及食到好多當地美食，相當開心，老爺奶奶亦很滿意今次旅程!

節瓜蝦米炒粉絲，叉燒

香蕉蛋糕(附食譜)

🤔好耐無整蛋糕，星期一我兩個小朋友放假我又唔洗返工，見好得閒，亦見屋企條香蕉🍌熟到就快爛又無人食，所以我拎佢黎用🥚全蛋方法整香蕉蛋糕食😉今次呢個蛋糕唔洗加泡打粉落去整架~♡製成品好靚仔👍 蛋糕質地亦好鬆軟👍 味道仲好好添👍真系好正加😅我唔系講笑架!!!我整好當日阿女自已一個人食佐4片呀，我呢兩日早餐都系食佢，每朝兩片香蕉蛋糕再加杯奶茶，真系好正!  早餐錢都慳返唔少🤣

今日有些少攰，食譜天日先打出黎 !

蒜蓉南乳雞扒，XO生菜

平時醃雞扒多數用蒜蓉，黑椒或香草醃，琴日見雪櫃仲有舊南乳所以試用南乳黎醃雞扒，估佢唔到咁好味，有時亂咁試吓新配搭系會有意想不到嘅效果，今次正正系一個好例子! 亂咁黎都咁好味，發覺自已對煮食呢方面確系有d天份，🤔邊有人自已讚自已架……哈哈😂😂😂我真系好傻😄

咸魚臘腸榨菜豬頸肉飯，蒜片炒油麥菜

呢排都比較忙碌，因為前排搵咗份兼職做，所以近排無咩時間寫blog，整餸方面都比較簡單，好耐無整有味飯食，突然想食就整佢黎食，真系簡單得黎又好味! 煮好個飯再炒埋碟菜，食得，就系咁簡單，咁就一餐喇! 哈哈~ 快~ 靚~ 正~ 

印尼斑蘭椰汁千層糕(附食譜)

上星期我系街見到有印尼斑蘭糕買，於是買佐一盒返屋企食，嘩，真系唔好食好粉質感好差，細細盒要10蚊一盒，早幾日系屯門新墟街市買佐d斑蘭葉，一大扎先7蚊咋，超抵!  趁今日得閒就拎d新鮮斑蘭葉打晒汁，整定晒d汁放雪櫃慢慢用，自家制就系零舍唔同，同街買果真系相差太遠，自已整真系超正♡又香♡又軟♡又滑♡又煙韌! 

沙參玉竹蓮子麥冬蘋果雪梨排骨湯，冬菇肉碎炆玉子豆腐，菜蕊

簡簡單單一個冬菇肉碎炆玉子豆腐餸加一碟青菜再加一碗湯，一家人能够坐埋一齊食餐簡簡單單嘅飯已好開心好足夠，幸福就系咁簡單 ! 

豉油皇炒河粉

一個月話咁快就完，呢個炒河粉系上星期日炒的，老公無啦啦話想食炒河，我話買外賣返屋企食，佢話街買嘅唔系咁好，老公佢話街買果d太多油唔健康唔好食，叫我自已炒，唉！炒河粉真系有點煩…… 事實上自己炒真系無咁油同健康d，算喇，反正我自已都鐘意食，一於炒多d當晚餐，阿女好鬼煩，我話晚餐食炒河粉，佢即問我系咪有韮菜同芽菜，我話系，佢即叫我裝起一碟無芽菜同韮菜嘅俾佢，哈哈!

甜酸咕噜肉，雲耳魚條炒西芹，赤小豆扁豆土伏伶湯

咕嚕肉我印象中我系無得整過咕嚕肉，因為我好少炸野的，唔喜歡炸野原因系要用好多油，炸完野我又唔想用返果d油，炸過野嘅油我覺得唔健康，的以我好少炸野，呢個咕嚕肉我整得一般! 比想像中差(•́︿•̀)……呢排d天氣真系好差，搞到個身體都攰攰地，要煲返去濕湯去一去身體d濕氣先得!

棉花糖厚多士(附食譜)

 呢個復活節假真系成日整野食，特别系整焗嘅野食~ 好似玩緊增肥計劃咁…哈哈! 呢個棉花糖厚多士前幾日已經整過，今日又再整，但今日系用薄方包去整嘅，所以無影相，嘻嘻(*^ω^*)呢個棉花糖好玩又好味 ! 材料及做法都超級簡單~ 簡單到3歲小朋友都識整架 ! 整好記得趁微熱果時食，如果灘到塊多士完全凍晒咁就無咁好食架喇!

【鮮奶蛋撻】 (附食譜) 【蜜糖鬆餅】

前日下午又試整蛋撻， 成功唔痴底，開心 ! 今次嘅蛋撻整得未系最好，撻皮雖然夠脆，但系撻皮顏色焗得唔夠均勻，下次要加倍努力……要好好地控制好個爐溫先得……今次蛋撻系跟blog友翠兒食譜做嘅，制成品成功，賣相尚算可以，希望下次可以焗得再靚d *\(^o^)/*
見焗開野我又順手整2個超簡單鬆餅試一試，記得blog友Kestrel話好似KFC嘅鬆餅，因為我鐘意食kFc嘅鬆餅架，所以我就試整佐少少睇吓效果如何，制成品樣貌好鬼似樣，質感都超似，系味道有些少唔出，但整體系好食嘅 ，下次可以再整黎食 (^▽^) ……系度再次多謝多謝blog友翠兒同Kestrel無私地同大家分享食譜 !

海鮮pizza(附食譜)

今朝見到fb回顧4年前嘅今日，兩姐弟食pizza，好得意呀！兩姐弟大個佐好多……今晚晚餐一於整返個同樣嘅pizza食吓先，可能太耐無整黎食，所以覺得特别好味! pizza yummy ~ yummy……

朱古力牛油蛋糕仔(附食譜)，菠蘿牛油蛋糕仔，原味牛油蛋糕仔

 呢個復活節假期真系長，我兩個小朋友放足2個星期咁制，由11號開始放假，放到24號先至返學，佢地放假我最開心，日日訓到自然醒真系好過引，閒時去行吓街玩吓完全無時間限制，爽……講返正題先，就系阿仔系放假前幾日問我可唔可以整蛋撻俾佢拎返學校請佢好朋友食，我就話蛋撻就唔系咁好，我驚你未返到學校已經整爛，不如我整蛋糕仔，細佬話都好，仲問我可唔可以整朱古力味，我話得，咁我就9號晚整好俾細佬10號拎返學校請同學仔食! 

٩(๑^o^๑)۶ 唔計今日仲有4日假放，過多4日又要朝朝6點起身了，諗起都覺攰，真系要好好享埋呢幾日……

雪燕鮮奶芋丸糖水

琴晚用鮮奶煲佐呢個雪燕糖水，做法超級簡單， 呢款糖水真系好鬼正，因為鮮奶味好香，雪燕又好滑，一路飲糖水一路覺得好滋潤，呢個糖水真系好好味，雪凍飲更加正呀 ! 我兩個小朋友好鐘意，因為我兩個本身都鐘意飲鮮奶，嘻嘻……

潮州蠔仔粥

好耐之前老公同我地去大排檔食飯，去親大排檔老公佢例排叫一碢蠔仔粥，佢話好好食，昨日我系元朗合益街市見到d蠔仔好靚，所以買佐1斤返屋企試下整，整出黎個樣唔錯，但味道就一般般，完全做唔到人地嘅效果，老公仲話一般，叫我下次唔好再整，唉！佢話我整得唔好味同埋好腥喎 (>﹏<) 阿囡同阿仔都話唔好食，叫我下次唔好整，算啦~ 我都系要放棄算……唔再整(*'へ'*) 因為我本身都唔系咁鐘意食架咋，嘻嘻 ! 

百香果戚風蛋糕(附食譜)

琴日新玩具到手……即玩整蛋糕，廚房仲有3個已經巢晒皮嘅百香果放系度，一於整百香果戚風蛋糕，我覺得制成品好靚仔，點知……兩姐弟話唔好食……佢地話我放得太多百香果汁，佢唔喜歡果陣味喎，叫我自已食晒佢，唉…… 一睇兩姐弟食呢個蛋糕個張相嘅樣就知……佢兩個有幾咁唔鐘意食，哈哈 ! 佢兩個叫我以後唔好整呢個百香果戚風俾佢地食，要整百香果就只可以整返早幾日果款百香果牛油蛋糕仔! 我問佢地點解唔好食？佢兩個話個戚風蛋糕有d酸，唔好味，而百香果牛油蛋糕仔唔酸，有牛油味香d好味d喎 !

芝士英式鬆餅(附食譜)

果日整完百香果蛋糕仔之後我個電動打蛋器就壞佐(•́︿•̀)…… 琴晚細佬叫我今日再整蛋糕俾佢食，佢話清明節佢唔洗返學，你唔洗凑我返學不如整蛋糕俾我食……我話個電動打蛋器壞佐，要買返一個先可以整蛋糕，前日落商場買，點知無貨要訂，要5號先有貨俾我…… 

ಠ_ಠ 無得整蛋糕~ 唯有拎系圖書館借返屋企睇果d煮食嘅書睇吓，睇吓有無d唔洗用打蛋器都可以做嘅蛋糕，睇書途中俾我見到英式鬆餅，我覺得唔錯，於是試整，出黎效果好掂，正系我想要嘅質地，但系呢款質感同KFC果款唔同架，KFC果種入面系濕潤d嘅，我依家跟書做呢款系外皮脆內裹軟，無咁濕潤架 !我做佐幾次鬆餅今次系最滿意，嗯……終於俾我個食譜，系我一直想要嘅質地鬆餅，岩岩出爐無耐我就食佐2個喇，微熱果時特别好食 ! 我超級喜歡呢款英式鬆餅 ! 原本兩姐弟唔多鐘意鬆餅嘅，佢地見我放芝士落去整，所以佢地都話要試食 ! 

😉原食譜系用紅苺乾嘅，但我屋企無紅苺乾所以用50克巴馬臣芝士粉代替，我個人認為用芝士粉整俾用紅莓乾整更加好食! 因為我一家四口都鐘意食芝士，嘻嘻 !

                 

清香桂花馬蹄糕(附食譜)

新年前整嘅桂花馬蹄糕，之前整理好個食譜我都唔得閒post返出黎，因為我系睇報紙見到好正，我就跟報紙食譜整，但系報紙食譜嘅份量系做好大量的，我無理由跟足佢，所以要將報紙食譜嘅材料分量一減再減，再自已改一改份量先試整，試岩佐做到自已認為滿意我先會記錄落黎，方便自已下次再整嘅時候可以跟住再做 ! 呢個馬蹄糕真系幾好食，有清淡嘅桂花味，蒸好放凉切片食已經好好食，煎完就更加好味更加香 ! 馬蹄糕系雪櫃拎出黎d顏色系暗亞色的架，只要用微波爐叮一叮或者用鑊煎一煎顏色即刻變回金黄!

合掌瓜紅蘿蔔椰子粟米咸豬手湯，香茅煎豬扒，白灼菜心

近排懶…少佐煲老火湯，無煲湯一排又要煲下，早幾見超市咸豬手特價$39.9所以買定一隻放冰霜，依家咸豬手貴佐好多50幾蚊一隻呀（ಠ~ಠ）琴日系街市買埋其他材料煲，簡單d買佐紅蘿蔔，粟米，合掌瓜，椰子黎煲够晒清甜，琴晚煲湯一粒鹽都唔洗放，兩小朋友話d湯好飲，而我老公就話d湯椰子味唔够，我話更系唔够，我本來無打算放椰子，系我下午去惠康買野咁岩見有事先整好一盒盒嘅椰子肉，我見咁方便咪買一盒細細盒1O蚊嘅净椰子肉放埋落去囉，哈哈……佢話唔怪之得喇咁小椰子肉又無椰子水，我問佢好唔好飲，佢話好，如果椰子味重d會更加好飲囉 ! 另外隻咸豬手煲完湯拎出黎攤凍我將佢起佐條骨，放少少黑椒鹽搽面之後拎去焗一焗，再放凉用煲鮮紙包好放雪櫃雪凍再切片就可以當小食咁拎黎食，好正 ! 我以前間唔中會系街買果d原隻已經焗好嘅咸豬手返屋企食架，但依家越賣越貴，要成70~80蚊一隻，所以我無買好耐嚕~ (@^▽^@)

百香果牛油蛋糕仔 (附食譜)

前日整俾2個小朋友食嘅百香果蛋糕仔， 第一次用百香果黎整蛋糕仔真系好好食，岩岩焗好攤凍食果時蛋糕仔個表皮仲系好脆內部組織好軟熟，好正 !

但系百香果味唔够濃郁，下次再整要加多d果汁落去先得，呢d百香果超酸，酸到呢……同檸檬有得揮呀！我將果核冲水飲，嘩~超酸，我要加好多蜜糖先至飲到，如果唔加蜜糖中和吓，我應該唔會飲，太酸我真系飲唔到，d果核系可以食架，對身體好好架 !

鮮茄肉醬煎蛋飯

我以前每逢煮肉醬意粉必定到超級市場買一罐罐即開即用嘅蕃茄意粉醬返屋企煮，自從學識自己煮蕃茄肉醬我無再去超市買罐頭意粉醬，我覺得自已煮健康d好味d，自已煮可以随着自已喜歡嘅味道而調教，例如酸d甜d都可以自已控制得到，煮法一d都唔難，材料好簡單 ! 我依家煮親呢個肉醬都會煮多d，分幾次食，食得唔快嘅話我會用密實袋袋好一餐要食嘅份量放入密實袋再放上冰霜存放，到想食嘅時去冰霜拎出一袋黎倒系碟上隔水蒸熱或者用微波爐叮熱即可以食，所以好方便! 呢個鮮茄肉醬配飯食好正，真系快靚正架! 亦可以配通粉，意粉，最好系將肉醬放系已經煮好嘅通粉或或意粉面再加芝士焗一焗再食就更加好食! 

忌廉鮮奶蛋撻

我地琴晚宵夜就系食自家制【蛋撻】!

唉~ 我整嘅蛋撻痴底呀〒▽〒……我朋友話我知要系蛋撻皮底部拮d窿窿俾佢梳氣，因為我無拮窿嘅關係，所以……唉！失敗了！須則系失敗，但味道都唔錯的(*^ω^*) 今次唔掂，雖有下次再努力 !

班蘭蛋糕

太耐無整班蘭蛋糕食，想食最好就系自己整，自己整健康d無防腐劑同埋可以放少d糖唔洗咁甜，呢款蛋糕好處系唔用牛油，健康好多，今次外形就好靓，厄得下人，哈哈……點解咁講？原因就系我脫模後就…唔靚仔，可能打蛋白打得夠好，不過整黎自己無所謂喇，自我安慰自已中.....哈哈 ! 對於我黎講外形系其次，最緊要味道好，我同倆個小朋友都好喜歡吃，爸爸對蛋糕興趣不大，但都會食小小嘅(^_-)兩姐弟見我整得多，佢地叫我帶d蛋糕去接佢地放學，等佢放學可以食，見到佢地食開心做我自已就會好興奮好開心^0^   

雙重芝士棉花蛋糕(附食譜)

好耐無整蛋糕喇，今朝系冰霜揾野揾到一舊仔忌廉芝士……見下午得閒就拎佢黎整棉花蛋糕…… 呢款蛋糕質感好好， 呢款蛋糕內部組織好靚，拎上手就感覺到好濕潤，好軟，好香， 食落口好軟棉棉，好正!……可惜太小芝士，哈哈~ 所以芝士味唔夠濃~

芝士蕃茄肉醬焗煙斗粉，煎豬扒

芝士蕃茄肉醬焗煙斗粉 , 好好味^3^

黑椒洋蔥炒雞柳，蒸水蛋，灼小白菜

簡簡單單又一餐.....

芝士咸牛肉薯餅，椒鹽多春魚

簡單美味的一餐 ~

蝦籽木耳豆苗雲吞

買佐d餃子皮包豆苗餃，皮就用完佐，但仲剩低半碗餡料，於是買佐5蚊雲吞皮黎包，我仲系原本嘅餡料上加佐蝦籽同木耳，加完蝦籽之後味道更加濃郁，我同倆個小朋友好喜歡食，包好當日老公放工叫我煮雲吞俾佢食，我問佢味道點樣，我老公食完之後話加佐蝦籽味道濃得制，無咁好，我話:如果你話味道濃得制無咁好，做麥你自已一個人食晒一打雲吞呀? 佢話:我話濃得制無咁好姐，唔系話唔好食喎，老婆你唔好搞錯……哈哈~ ~~😂😂😂

※ 我個人覺得包雲吞俾包餃子更加容易更加快!  包法超級簡單，三角形對折，之後用手揸埋佢個口就得，唔洗用太大力揸埋佢個口，因為煮果時d皮會收縮，個口自然會盒埋的，真系好易好簡單架咋! 

豆苗豬肉蝦餃

好耐無包餃子，近排街市d豆苗嘅價錢都賣得幾合理，於是買佐一斤用佐大半黎整餃子，同埋用佐2包蝦仁加埋落去，味道更加好食 ! 

結婚10周年 · 紀念日

時間過得真系好快，琴日2月6日系我同老公嘅結婚周年紀念日，10周年喇10周年喇~ 話咁就過佐10年! 多謝老公嘅禮物 ! 希望往後還有無數個10年~ 祝我地一家四口繼續幸福快樂，甜甜蜜蜜! 

五香芋頭糕，桂花馬碲糕，臘味蘿蔔糕

呢排真系好忙，好忙，農歷新年前(年廿八)用佐一日時間整佐以下呢3款賀年糕點，五香芋頭糕，桂花馬碲糕，臘味蘿蔔糕~  依家先得閒post出黎，嘻嘻~ 到目前為止我試佐芋頭糕同馬蹄糕，芋頭糕好香，今次做得好好，我自已好滿意，另外馬蹄糕就俾我想像中差小小，味道淡佐dd，同埋今次嘅馬蹄糕彈性感覺一般般( ー_ー)!! 之但系我姑奶試食完同我講話蘿蔔糕同馬蹄糕就話好好味同好好食，仲話我d糕整得好靚，但我自已又唔覺得系好靚，可能我自已要求高，哈哈!

2O17雞年快樂 !

🎊恭喜發財💰恭喜發財💰🎆2O17🐓年~ 大年初二
👧在此恭祝所有親朋好友 : 新年快樂💖  身體健康💪
🍻 萬事如意   💵 財源滾滾  🍊大吉大利  🌸花開富貴
🐣雞年全年行好運🎡  ~  😋 恭喜 ~ 😋恭喜~ 😋恭喜 ~

兩公婆唱卡

結佐婚成10年, 我們第一次去唱K , 要好好記錄一吓先的......嘻嘻........ 

炒素菜，蝦醬腩肉蒸豆卜，菜蕊

今日繼續炒素菜，3碟之中其中2碟都系蔬菜，名副其實系多菜少肉健康餐……我見到咁多蔬菜即刻食欲大減，但我唔會等待薄自己嘅，一於整返碟重口味餸黎平衡吓……哈哈！蝦醬蒸腩肉簡單好味，送飯一流，我最喜歡d豆卜超級正，豆卜吸收佐d肉汁，嘩~正到無朋友……超級惹味！

XO炒鍋筍，生煎蓮藕肉餅

婚後咁耐以黎第一次買鍋筍食，好耐之前系系阿媽屋企食過，覺得味道一般，但老公近排叫我整多d齊菜俾佢食，佢話唔想試下食齊菜唔想食咁多肉，叫一個食肉獸黎煮齊菜真系有難道，哈哈……因為我唔喜歡食齊菜，我系無肉不歡的，我同老公講我盡量煮喇，其實我系唔識煮同埋唔想煮，呵呵！我對齊菜真系唔多識，求其煮……今日就煮佐呢款鍋筍珍珠筍同雪耳，老公話好食喎，我就覺得一般，炒好所有材料覺得好清淡我又多手放一匙羹XO醬落去，哈哈，即刻好味好多……另外蓮藕餅我特登加多d蓮藕絲放少d肉落去，咁樣感覺健康d(^_-)

南北杏生熟地木瓜雞腳豬骨湯，豬肉蓮藕餅，菜心

早幾日煲嘅湯，我煲呢款d湯好似豉油咁黑……唉……要招呼客人真系唔好煲呢款湯，d湯黑蚊蚊咁真嚇親人……嘻嘻！生熟地木瓜湯我系阿媽屋企飲過好多次，我自己系屋企煲就系第一次煲，第一次煲嘅關係可能我放多佐生熟地所以搞到d湯好似豉油咁黑，賣相真系超級唔掂，但系好好飲架喁，啖湯好甜，我問兩個小朋友d湯好唔好飲，佢地都答我話：媽咪你今日煲呢d湯飲落好似系飲緊無汽嘅可樂，好甜呀，哈哈！

柱候蘿蔔牛腩，滷水雞翼，菜蕊，火腿炒蛋，上湯浸娃娃菜

老公早幾日無啦啦問我識唔識炆牛腩，我話之前炆過你話我炆得唔好食，所以我之後都無再整，老公話我好想食蘿蔔炆牛腩但出街食又貴又小……我想你整俾我食，嗯……咁好喇我買野返黎試下炆，其實我唔系好識，所以今次上youtube搜尋蘿蔔炆牛腩，果度有好多影片教你，我當然揀d簡單方便果d跟住黎整喇，哈哈………第一次用柱候醬炆野，我之前都有炆過牛腩之但系我唔系用柱候醬去炆，如無記錯我之前系用麵醬去炆，老公話唔好食，但我自己覺得用麵醬去炆都好食，原來今次跟youtube嘅人地用柱候醬去炆牛腩更加好味，連老公都話好好食，佢仲食佐好多……兩個小朋友仲不停"不"d汁用黎撈飯食添呀，佢地個個都話好正好好味！炆一次我地一次食唔晒，隔餐再食，點知隔餐食仲好食……好味到老公叫我過多一星期又用返今次方法再炆多一次，下次要買埋d牛筋落去一齊炆喎，哈哈……

2017新年＆元旦快樂！

🎊♡2 ~ 0 ~ 1 ~ 7♡🎊

☆…… 新 年 快 樂 ……☆

時間過得好快，2016話咁快就過完，希望在新一年我身邊所有親朋戚友都身體健康！2016除夕我地過得好充實，我地一家大細同姑奶佢地一齊去工展會行街買野吃野，行完工展會之後去元朗B仔食甜品，我地吃完仲外賣佐d甜品返佐去俾老爺奶奶佢地食，系老爺屋企玩佐一陣我地就返屋企倒數過新年，同小朋友系電視機前一齊大聲倒數最開心……倒數完再一齊欣賞煙花🎆