紅棗雪梨雪耳蘆薈糖水 , 腐竹白果咸瘦肉紅蘿蔔粥

呢排天氣都幾乾燥下 , 我要煲返d清潤野黎飲飲先得.......乾燥天氣最好用雪梨黎煲湯或者煲糖水 , 功效好好架 , 同埋呢個時候d雪梨好甜 , 呢排早晚都有d涼 , 又係時候要搵返d冬天衫褲出黎 , 諗起要換季都煩 >_< "

早幾日煲佐紅棗雪梨雪耳蘆薈糖水 , 我覺得呢個糖水好潤好正 , 蘆薈係奶奶自己種植的 , 蘆薈ge功效真係有好多 , 想知就上網搵資料喇.......我唔係呢度多講 ! 嘻嘻 ~ ~ ~ 

紅棗雪梨雪耳蘆薈糖水 :

 材料 : 紅棗    10粒  ( 去核 ) 
            雪梨    1個   ( 去芯  ) 
            雪耳    1朵   ( 浸軟切硬位 , 撕開 )   
            蘆薈    2大支 ( 去皮起肉 )
            片糖    適量 

做法 :  所以材料洗淨 ,  放入煲里加入所需要的水量 ,
            我用鵝姐煲 , 煲佐10分鐘 , 就可以食得 . 



小貼士 :
依家呢d乾燥天氣 , 用片糖會潤d , 用冰糖都可以架 ,
紅棗一定要去核 , 唔去核會燥 , 雪梨就一定要去芯 , 
 無去芯煲出黎ge糖水會有酸味的 , 如當天飲唔晒
就放返入雪櫃 , 凍食都好正 , 我個人喜歡熱食  ^o^  
                






昨日兩個小朋友都有小小唔舒服 , 本來昨日煲粥俾佢地食的 , 因為我覺得有小小攰所以無煲到 , 昨日我飯都無煮 , 我落街買咋 , 哈哈.........  
自從阿囡升佐上小一之後 , 真係攰佐好多 , 
一個星期有4個早上都唔得閒 , 忙到甩碌........=_ ="
星期一&二: 參加阿囡學校的家長普通話班 , 
星期三 : 參加阿仔幼稚園家長小組(教育兒方法)
星期五 : 家長講座(用基督教理念教小朋友)

我頭2個星期以上的日子都有出席的 , 到但第3個星期我已經頂唔順了......我體力有限......實在太攰 , 決定唔參加星期五的講座....要退出 , 最主要星期五的課程好鬼死悶 , 悶到我聽聽下想訓覺果種囉 ^e^ 哈哈.....  因為我咁忙所以依家早上好多時都唔煮飯 , 係街買或者煮麵食就算 , 搞到老公炸我型 , 嘻嘻.....  ^@^  講返正題先....我今朝煲ge靚粥 , 哈哈~ ~ 腐竹白果咸瘦肉紅蘿蔔粥 ,  我用"樹記"腐竹黎煲 , d腐竹竟然煲唔爛喎 , 我諗係咪有咸瘦肉係度ge關係 , 所以煲唔爛呢 ? 我真的不明白 , 唔爛都唔緊要 , 最緊要d粥好味就OK 喇 ! 

用咸瘦肉煲粥特別好食 . 

紅色碗係謙謙細佬 , 藍色碗係盈盈姐姐
佢兩個一人吃佐一碗 . 

黑色果d係皮蛋 , 得我一個人有咋 , 哈哈.....
皮蛋放的耐怕唔好 , 所以唔俾佢兩個吃 ,
今朝我吃佐2碗粥 , 好飽 ^0^

腐竹白果咸瘦肉紅蘿蔔粥

材料 :  樹記扁腐竹          1塊
            鮮白果                  8粒
            瘦肉                      適量  
            紅蘿蔔                 半條(細)
            米                         半飯碗
            水                          適量


做法 :  買返黎的瘦肉用鹽醃一晚 ,用前要出水 , 
            紅蘿蔔去皮切粒 ,  
            腐竹  ,  鮮白果  , 米洗淨 , 放入煲里加上所須要的野 ,
            用鵝組煲 ,  自設時間 45分鐘  , 煲好加小小d鹽調 , 即可 .