紐約芝士蛋糕，雜果天使蛋糕

今次對我黎講真系一項幾大嘅挑戰，要一次過整2個生日蛋糕，講真真系有小小驚，因為整黎同阿媽慶祝生日時食的，同平時就咁食好唔同，所以今次要認真小小去整，話晒系阿媽生日，我唔想整到個蛋糕好丑樣，裝飾果度真系花好多時間去整，望落須則簡單，但對我黎講已經好難，嘻嘻(^_-)最後……好在個個都話我嘅製成品賣相好好，至於味道呢，紐約蛋糕同之前整嘅一樣味道好好，芝士味好香濃，而天使蛋糕今次就反而做得無咁好，無平時咁鬆軟濕潤，可能我轉佐用新嘅低筋粉(水手牌超級蛋糕粉)，所以出事，原來佢嘅低粉入面加入山藥粉，我整蛋糕時加低粉落去攪拌粉都覺得奇怪，比起平時用嘅日本低粉系難攪拌小小，我覺得系d粉嘅問題，但製成品系好食嘅，之不過無用日本粉做出黎咁鬆軟！整體黎講大家都好滿意今次呢兩個蛋糕，我見個個食d咁開心，我自己亦好開心，好有成功感同滿足感！

聖誕快樂……2015，聖誕壽司大餐，自家製生日蛋糕

今年聖誕比較忙，所以無乜時間去寫blog，聖誕前幾要幫兩小朋友準備聖誕聯歡會小吃，之後又要買材料預備整蛋糕，因為26號我地提早同婆婆慶祝生日，前排家人話不如婆婆生日時唔好買蛋糕，叫我整，佢地話我整嘅蛋糕仲好食過街買果d，見佢地個個都話想我整，咁我就答應整生日蛋糕，表哥表姐見我話要整蛋糕，佢兩個誄要學我整，所以25號過佐黎我度學我整同埋同兩個小朋友玩，之後我仲佢地一齊吃壽司聖誕大餐……果幾杯木糠布丁系幾個小朋友自己親手整架，整得幾好，唔錯唔錯，小朋友整都叫靚架喇！表哥表姐走時我仲叫佢地幫我拎一個天使蛋糕過阿婆屋企先，嘻嘻，唔洗我26號一次過要拎2個蛋糕去搭車，真方便(^_-)

天使蛋糕，雙色果仁曲奇

我之前報嘅蛋糕班已經結束佐一段時間了，今次呢個天使蛋糕就系上蛋糕班堂時學整的，今次焗呢個蛋糕焗得好靚，完全無爆面，反而上次上堂時整嘅蛋糕就嘛嘛地，今次呢個蛋糕系整俾表姐表哥佢地食的，佢地吃完話返俾我聽個蛋糕超正，好好食，俾街買嘅好食好多，可惜嘅系個蛋糕細得制，吃完想再食，都已經無得吃了，哈哈……我聽完覺得好開心同埋好好笑，因為我無諗過佢地咁鐘意食架，既然咁鐘意食，咁我下次一定要整個大d又或者整2個細嘅先得(^o^)……  另外仲整佐小小果仁曲奇俾佢地食(^_-)

日式芝士麻糬波

首次試用純木薯粉黎做麻糬芝士波，味道幾好，軟軟的好好食，其實同我之前整過芝士波用糯米粉溝木薯粉的都差唔多，分別唔大，衰在呢d麻糬波要即日吃先軟身，隔日食就唔系咁好食……有d硬(￣Д￣)ﾉ  一定要焗返熱或叮返熱先得(╯з╰)

冬至飯，第50屆工展會

今日老公放假，一早放兩姐弟返學之後就同我出元朗食早餐，吃完就坐968出去維園工展會行下，行完返屋企接完放學又要煮飯，今日真系好忙，但忙得好開心(^o^)

老公上星期已經問我18號叫爺爺嫲嫲過黎一齊食飯順便提早【做冬】食飯好無，我話無所謂，所以今日就煮多幾個餸，不得不贊d大蝦，真系好好食，好大隻d肉質好好，148蚊一斤，一斤得6隻蝦，d流浮山蠔都唔錯！

粒粒芝士鮮奶方包，豬膶粉腸皮蛋粥

呢款方包食譜系FB入面d人分享出黎得，我見人地整得好靚，我又跟人地食譜去試做一次，睇下效果如何，總得來講呢款方包味道唔錯的，如果即日食晒就無問題，但隔日吃呢……佢就會硬，我個人覺得始終都唔及低溫發酵好！

綠茶棉花蛋糕(附食譜)

昨晚漏夜整俾兩姐弟今日帶返學做零食，阿仔昨日下午同我講媽咪我就快無零食帶返學校食喇，不如你今晚整定d蛋糕俾我天日帶返學校當零食咁樣食好無呀，阿仔叫到，我幾辛苦都會去做俾佢，難得阿仔出聲話要食我整嘅蛋糕，我當然去做……呢款棉花蛋糕好處系吃完蛋糕唔會話要不斷飲水，因為呢款蛋糕質感比平時清蛋糕質感還要棉密和濕潤，所以我自己都喜歡食棉花蛋糕和戚風蛋糕！

咸菜胡椒豬肚支竹排骨湯

基本上每年冬天我都會整呢款湯黎飲，我自己好鐘意食豬肚，最惨系豬肚難洗，真系要用花好多時間去洗，所以我都少整黎食，有人建議我買急凍豬肚就唔洗煩，但我唔喜歡急凍，怕唔乾淨，所以我喜歡買新鮮豬肚自己洗，新鮮豬肚煲出黎嘅湯的確系鮮甜d好味d，而豬肚亦好食好多，依家d豬肚貴佐，我買呢個要40蚊呀，仲要唔系每間肉檔有得賣，我行佐2檔都話無，有人留起佐，去到第3檔先買到，依家好多時d人地一早同肉檔講留起，咁我地想買都無！呢d天氣凍凍地飲呢個湯我覺得好正！

菠蘿包，雞尾包

阿仔期待已久嘅菠蘿麵包終於整佐了，阿仔話我勁喎，哈哈……笑死我，同埋整佐4個唔正宗口既雞尾包，嘻嘻～因為正宗雞尾面頭系有2行野的，而我就無整…….今次呢d包樣子就OK，但系俾我想像中差小小，d菠蘿皮唔夠酥脆，而雞尾包d饀又唔系咁得，唔夠濕潤較滑，下次要再努力先得！

牛油果刺身，蜜糖鬆餅

首次拎牛油果咁樣食，其實我唔系咁喜歡食牛油果架，幾年前食過一次，唔多鐘意，所以一直都無買黎食！ 前排我系微信度見到我小學同學仔拎牛油果當三文魚刺身咁樣黎食牛油果，佢話吃落感覺好似吃緊三文魚，我心諗：吓……似三文魚系真唔系呀？我好鐘意食三文魚架喎，咁我一於要賈返個黎試下先，早幾日買佐2個好青好青嘅牛油果返屋企，放佐幾日摸落有小小淋，所以拎黎加刺身豉油和芥末醬一齊食，試佐一啖我覺得好奇怪，真系有d似三文魚喎，咁樣食牛油果真系好正，净食牛油果我就唔鐘意食，哈哈！

芝士香蔥火腿芝麻卷

呢款香蔥火腿卷用直接法，做出黎嘅效果都唔錯，當日食就好軟熟，如果隔夜就無咁軟，一定要焗返熱先會軟，但用低温發酵做出黎嘅包隔夜再食唔焗返熱吃都一樣軟，所以我暫時都系比較喜歡用低溫發酵麵種黎整麵包！

黑椒牛仔骨，荷包蛋，蠔油菜蕊

市面上嘅牛仔骨越賣越貴，唉……今次系結婚後第二次自己買牛仔骨返屋企煮，出街我自己好鐘意叫牛扒，牛肉，牛仔骨食架，但真系越食越貴，好唔化算！都系自己買返屋企自由發揮，亂煮……亂煮……哈哈＼(^o^)／

鮮菌白汁煙肉意粉

阿囡上星期三夜晚無啦啦同我講媽咪我天日放學跳完舞返到屋企想食白汁意粉得唔得，我話好呀，反正之前買佐幾包意粉都未煮，加上我都好耐無煮意粉食，一於天晚吃意粉，唔洗煩，其實日日要我諗要煮咩餸俾佢地食真系幾煩架，仲要餐餐都唔可以同款，哩個唔食呢樣，果個又唔食個樣，唉……真系好傷腦筋！

芝士火腿吐司，吞拿魚粟米包

昨日一次過焗佐2樣包，反正都系要吃，咁我就試下一次過整多d放系度，起碼可以吃4日，唔洗日日整，早餐我地主要系吃麵包多架，哈哈……簡單d一款麵團做2款包，一款系芝士火腿吐司而另一款就系吞拿魚栗米包，我發覺整包系會整上隱，其實我整包黎黎去去都系整果幾款包，花款唔多，加上我兩個小朋友指定系吃果幾款包，就算出街買都系買黎買去果幾款包，例如芝士火腿，吞拿魚，肠仔，蒜蓉包，芝士條……多數系呢幾款！有得揀嘅情況下甜包佢地系唔多鐘意架，嘻嘻……

蘋果紅蘿蔔粟米椰子西施骨湯，金菇肥牛卷，煎豬扒，蠔油芥蘭

呢排懶佐……少佐煲湯飲，其實呢d天氣真系要飲多d清潤湯水，否則皮膚好易乾燥同痕癢，今次煲湯嘅蘋果唔系我買的，系阿仔阿女系學校吃飯時飯商公司派嘅，學校次次派親蘋果俾佢，佢地就拎返黎俾我，真系俾佢兩個激死……(╯з╰)

火腿炒蛋，咸魚蒸肉餅，蠔油生菜

我發覺兩姐弟越黎越鐘意食炒蛋，蒸滑蛋，但烚蛋，咸蛋佢兩個又唔鐘意食喎，真系奇怪…… 小朋友d口味你真系估佢唔到架，哈哈！

豉椒味菜肥牛，上湯灼菜芯，冬菇肉燥

肥牛我好喜歡用味菜同埋唐芹去炒，我覺得好好味，我自己好鐘意食，但老公就話唔鐘意我加唐芹落去炒，今次我又多手加佐2隻尖椒落去，咁岩今次買嘅尖椒好辣，辣到飛起……連我食得辣嘅人都覺得辣，哈哈……老公話辣得好過隱，d牛肉吸埋d辣味，越食越正喎！

串燒雞包，芝士腸仔包

前幾日用佐阿仔同阿女最愛嘅串燒雞去整包，兩姐弟每人吃佐2個串燒雞包，佢地話好好食佐，我試佐一啖，味道確實系唔錯！

火腿蛋包 / 芝士火腿包(低温發酵)

大大話有成年無整麵包了，部麵包機買佐返黎放系屋企整佐無幾多次就收埋佐部機無整，老公上星期話我，你部麵包機買返黎用佐無耐就唔用，都唔知你買黎做乜，你成日都系街買麵包俾我同對仔女早餐食，其實街買嘅麵包一d都唔平，連簡單豬仔包都要5蚊一個，你自己識整包，不如每日整包俾我地吃喇，自己整點都會平d同健康d呀嘛，返正你買完餸都系返屋企無野做……就系咁俾老公話完之後，呢幾日下午都系屋企玩整麵包……

天使焦糖脆脆蛋糕

琴日又去佐學做蛋糕了，今次呢個蛋糕味道同外表都好好，系唯獨蛋糕内部組織就差佐小小……我老公仲話我搽忌廉搽得唔够多，所以無咁好食喎……-_- #

有禮物收Note5，南乳支竹豬肉炆藕片，冬菇炆雞

好開心老公上星期五11月6號夜晚送佐部電話俾我，系新出無耐嘅Note5……嘻嘻……有新電話用好開心！昨日朝早出元朗拎埋張迷你SIM卡，今日裝返好就可以用～爽……新電話用噜……哈哈……要再次多謝老公多謝老公……＼(^o^)／

有米豬@屯門藍地季季紅

上幾個月嘅事，老公同佢d同事約8月25號去季季紅酒樓食飯，老公話果度嘅有米豬好出名的，好好食，仲要系要提早訂先有得食喎，佢話我無食過，所以帶埋我地去食，我真系第一次食有米豬，超正，d皮脆卜卜……d飯香噴噴……真系另我一試難，好想再去食多一次，食過番尋然，嘻嘻……我覺得無10個人都唔好叫呢隻有米豬，切開晒真系好多，其實乳豬個肚入面系有好多飯架，果晚我地7個大人，加我2個小朋友再加2個1歲左右嘅BB都食剩好多乳豬同飯，食唔晒要拎走，大飯盒2盒咁多，我唔客氣喇我拎佐一盒走……哈哈！可想而知隻豬真系唔野少，其實呢隻豬足夠12個人份量，因為仲有其他餸食……另外佢果度嘅豬肺湯好好飲，無落味精的，有湯飲之餘仲有湯渣食，好正 !

學整蛋糕@工聯會

原來我有成2個月無黎呢到寫過野，哈哈！呢兩個月都幾忙碌，要自己一個人湊住兩個小朋友，想唔忙都幾難，忙到我無麥心機黎呢度寫野，小朋友一開學同埋一齊返小學其實我d時間系俾之前多佐小小的，但我都系覺得d時間唔够用，呢個月趁早上有多d時間，我就去佐工聯會學整蛋糕，真系幾好玩，有得玩之餘又有得吃……唔錯(^_-) 我想報埋麵包班，可惜佢d時間唔岩我，一系下午一系就夜晚，唉…下午系2：30先開始至5點半完，我3點半就要去接放學，所以報唔到，有d失望!

小一迎新日及家長會，火腿炒蛋，漢堡扒炒娃娃菜，南乳煎腩肉

昨天30號系謙謙細佬小學小一迎新日及家長會，玩埋今日，休息埋今日，悠長暑假要結束了 ! 明天就要正式返學喇……唉……惨……(>﹏<)一諗起每日都要早起身我就頭痕……日日要湊返學放學，又要教佢地功課，又要買餸……真系煩到爆…… 唯一好小小就系我唔洗每日搭6轉巴士，因為阿仔升小一喇，同姐姐同一間小學，我凑返學放學都輕鬆小小咁喇…… 希望细佬快d適應小一生活，家姐升3年班了，俾心機讀書呀家姐……要同細佬一齊努力呀! ! ! 

馬拉盞炒娃娃菜，香煎豬扒，土伏苓排毒去濕湯

放假放到人都懶埋，好耐無煲湯，今日就黎煲士伏苓清清d毒素，哈哈……事關放假系屋企唔多願去做野，得閒就系去食野，食親都系熱氣野，又好常去幫親麥當勞同KFC，想唔熱氣都難，所以煲呢款湯就岩晒清熱去濕排毒，正……原來用馬拉盞炒娃娃菜系好好味，今晚炒得太少，唔夠食……嘻嘻！

清蒸紅鲔，火腿魚蛋炒韭菜花

呢餐好簡單，蒸條魚再加碟菜，屋企餸清晒，我要兩個小朋友一齊去買餸，我問佢两個食咩餸，盈盈就話是但，謙謙就話要食魚，系魚檔見到有䱽魚，鱸魚，紅鮪，魚……我叫謙謙揀一款，佢揀條紅鮪……系佢自己揀所以食都食得多一d，呢條魚多數系佢兩個吃，我净系执手尾咋，事關我對魚系一般的，可食可唔食……

小豆島@天瑞，天瑞街市

屋企附近開佐間壽司店，即系我平時去買餸果度，由我屋企行路過去都唔遠，行10分鐘路程左右喇，上個星期老公放假話想去試下，價錢好平民化，味道唔錯，可能附近多數系屋邨關系，所以價錢就平d，過佐2日老公返早，我去買餸無人睇d兩個小朋友，變佐我要帶住佢地一齊去買餸，買餸前我地3個人走去試下佢d早餐，早餐就一般，無特別… 昨日老公又放假，佢又話想去天瑞“小豆島”再食，但今次系午餐時段，老公仲叫埋老爺奶奶同埋大伯娘一齊去食，奶奶佢地話d刺身好新鮮，所有食物都好食，又唔貴，可惜唔記得影相，5個大人加3個小朋友埋單唔洗400蚊，仲要個個食到好飽，真系抵食，如果我地咁多去飲茶最少要500幾蚊，可能食得唔飽果種……呢間野我地試過早餐，午餐，下午茶，系未試晚餐，揾日再去試……哈哈……暫時下午茶時段系最抵食的 ! 我兩個小朋友好喜歡吃日式野(^_-)特別系壽司，我問佢點解，佢兩個異口同聲話d壽司飯好味……哈哈……

豉油雞，蒜蓉白菜仔

超耐無煮過豉油雞，煮呢個豉油雞系一滴水都唔須要落的，净系用生抽豉+老抽豉油+小小糖落去就可以了，真系好好味，如果用上新鮮雞去煮更加好食 ! 今次加埋已經炒香佐嘅洋蔥落去更加好味，其實我好唔鐘意買小白菜吃，因為好多沙，要洗好多次，但阿女偏偏鐘意食……唉……無計，就下佢……(￣Д￣)

香蒜肉絲牛油火腿炒天使麵，火腿雜菜沙律，醬燒豬肘骨

曰日食飯到悶悶地，昨日就整佐個炒意粉，呢款炒意粉好好味，我自己好鬼鐘意食，須則好鐘意食但真系唔可以成日炒黎食，真系超級肥的，因為系用大量牛油炒香大量蒜蓉，果陣蒜蓉牛油香味真系無法抗拒……實在太香太好味 !

日式放題 @ 至尊滿屋

上個月尾7月26號，大嫂突然一個電打黎問我去唔去放題，我即刻一口答應佢話……去呀，因為我系一個好鐘意食自助餐同放題嘅人，哈哈……難得有人陪我去食我更系去喇，就算吃到夜一夜都唔怕，大嫂話去試新野，佢聽我家姐話至尊滿屋d食物唔錯，於是訂佐呢間，去到店舖時個感覺都好好，整體食物都好好，d刺身真系正到暈，果晚我地每個人都食到好飽好飽，我仲有好多食物未試，如果人陪我再去，我都好想去多幾次呀！再次要多謝我大佬大嫂請我地3個去食佐一餐咁豐富嘅晚餐，太好味太正了!

韓醬焗辣雞脾，鮮茄肉醬意粉

對上一次用呢款韓醬黎醃雞翼，用煎pan黎煎，煎了一陣雞翼未煎熟已經燶了，我已經用細火去煎，但都系燶，所以今次我用呢款醬醃野就唔會用煎嘅方法，今次改用焗的方法就好得多了，而且味道很好，有輕微辣味，又不會太辣!

蝦醬腩肉蒸豆卜，香煎豉油雞翼，日式甜咖哩魚蛋，蕃茄薯仔西施骨湯

好耐無煲蕃茄薯仔湯，早两日就煲佐黎飲，再黎簡簡單單整3個餸就算了，呢排去親買餸就會買定3日餸，費是成日落去買餸……哈哈 *^O^*

洋蔥肥牛，蝦米炒節瓜，粟米節瓜渴

簡簡單單洋蔥炒肥牛，再黎一瓜二食，一半用黎滾湯，另一半就用蠔油蝦米炆節瓜，呢d天氣滾下瓜湯真系唔錯 !

火腿豆卜炒雜菜，榨菜肉餅蒸滑豆腐，鵪鶉蛋腐竹白果薏米糖水，消暑大西瓜

我好似好耐無煲糖水了，今日下午得閒就煲佐一煲鵪鶉蛋腐竹白果意米糖水，可能太耐無飲呢個糖水喇，今日覺得特別正！今日呢两個餸我都系好求其咁煮，嘻嘻……飯後水果系吃大西瓜，今年我未試過買黑美人西瓜，買親西瓜我一定系買馬來西亞大西瓜，我依家怕佐d黑美人西瓜，怕佢有打針 (^_-)

蒜蓉牛油煎帆立貝，忌廉粟米燴豆腐，蒜蓉西蘭花

呢幾粒帆立貝系上年我去工展會時買的，一大包食剩呢10粒，無去買餸拎佢黎用蒜蓉牛油煎一煎已經好好味，廚櫃揾到一罐忌廉粟米，岩晒我，前日用剩半盒百福豆腐就放埋落去煮，搞掟又多一個餸，想炒碟菜，點知d菜無晒，得返一個西蘭花，哈哈……唯有食西蘭花!

素鵝，魚肉釀茄子，欖菜肉碎炒四季豆

其實我都唔記得之前買佐呢條系素鵝定素鴨，哈哈！因為買佐好耐架，買佐返屋企無食，跟手放去冰箱度，一放就半年，嘻嘻… 早幾日去冰箱揾野先揾到佢，經解凍之後……我將佢2面煎至金黄，便切開佢黎食，岩岩煎好脆卜卜又幾好食喎! 但系我两個小朋友唔鐘意食……←_←

黑椒洋蔥吞拿魚醬(附食譜)

呢個吞拿魚醬用黎夾麵包或者夾餅乾或者就咁食都系好好味！鐘意食可以一次整多d放雪櫃隨時食得，呢款醬整好佐之後放系雪櫃大約可放1星期左右，當然唔好放太耐喇！做法好簡單，喜歡就跟我方法去試下做喇 ! 

冬菇榨菜肉絲煮豆腐，咸蛋芥菜粟米肉片湯

咸蛋芥菜湯我第一次煲咋，湯同菜嘅味道有小小甘甘地，我就一般，唔多鐘意，呢味冬菇榨菜豆腐我就好鐘意喇，撈飯食一流呀，見有盒芋絲放佐系度有成半年，哈哈…掉埋落去煮吸埋d味真系好正，阿仔食佐好多芋絲(^o^)……

甜酸蕎頭排骨，蒜香辣豆醬炒通菜，煎荷包蛋

呢個餸我結婚8年以來我都無煮過，我細個時阿媽好常煮，自從阿媽無做野之後都無煮呢個餸，無食過都有好幾年了，依家過親阿媽屋企多數都系大嫂煮，而我就負責食，返阿媽度就有返做女嘅感覺，咩都唔洗我做，一向講曬似做女皇……哈哈………

上個星期阿嫂突然煮返呢個餸，我同阿哥都大讚好味，太耐無食喇，雖然無阿媽煮得咁正，但都好好食，因太耐無食！早幾日我諗唔到煮咩好就照板煮碗試下煮呢個蕎頭排，味道真系好好！可惜d排骨瘦佐小小，如果肥返小小煮出黎就更加好味！我問老公呢個蕎頭排骨味道如何，佢都話唔錯唔錯，甜甜酸酸好開謂，好好味！

香草海帶綠豆沙糖水，肉碎豆腐炆茄子，辣肉肠秋葵炒蛋

放暑假我無特別地方要去，多數留系屋企避暑，哈哈…… 佢地放假我就舒服d唔洗一日走幾轉，多佐時間留系屋企，我好自然就會走去廚房搵野搞，前日就玩包木耳韭菜餃子，而昨日就玩煲綠豆沙糖水！昨晚就簡單d煮個肉碎豆腐炆茄子，仲有吃返前日吃剩的秋葵-_-# 另外附送上一碟之前整的餸：辣肉肠秋葵炒蛋，嘻！

日式沙律汁伴秋葵，咸菜肉碎蒸茄子，芝士長通粉，紅肉火龍果

陰公……昨晚嘅餸菜無人幫襯，最後都系得我自己一個人吃d餸，仲食净d秋葵，留黎第日再食，今次系第二次食秋葵，老公下午打電話問我夜晚有咩餸，我話有秋葵，茄子，佢即答我媽咪你食多d，食埋我果份，唔洗留餸俾我放工食，哈哈！我两個小朋友試佐一啖秋葵即刻話唔好食，唔食，其實我試完都唔鐘意食，哈哈… 可能你會問我你唔鐘意食點解又買呢？其實系上星期我見街市做特價7蚊一包，所以買黎試！第一次系用秋葵辣肉肠炒蛋，結果都系一樣(-_-) 無人幫襯，阿囡净系食蛋同辣肉肠，d秋葵留返系碟上，另外茄子我系極小極小買黎食的，今次呢d茄子唔系我買..……系奶奶俾我的，我覺得茄子好難煮得好食，想好食一定要炸一炸佢！我两個小朋友不嬲唔鐘意食茄子，包芝士長通粉系759買的，两個小朋友話味道一般，叫我下次唔好買，嘻！近排好常買紅肉火龙果食，紅肉比白肉貴好多，但呢排見紅肉平，21蚊3磅，真系好平，見平所以買黎食！

苦瓜唐芹炒豬頸肉，蟹柳蒸滑蛋，腐乳生菜，放暑假

今日呢碟野苦瓜唐芹炒豬頸肉系我亂咁炒的，哈哈……見雪櫃仲有d豆卜同唐芹净系度，我又放埋落去一齊炒，估唔到d豆卜咁受歡迎，佢吸晒肉汁真系好好味！反而d豬頸肉無乜人吃……唉～ 

※細佬謙謙今日開始已經放暑假了，但盈盈今日都仲要返，姐姐天日開始放假喇……太好了，佢地放假我就可以訓晏d，嘻嘻……(^_-)

減肥蔬菜湯

冬天儲埋儲埋嘅能量系時候要減減佢，冬天不停食食食，毫無節制……搞到我儲佐好多脂肪儲系身上，著返上年著ge衫褲好明顯知道自己肥好多……上年d褲依家著返系好緊身，哈哈！經過2個月黎的努力，終於減到我想要的磅數了，5月底磅佐系11O磅，我自己目標系2個月合共減10磅，但老公話如果我2個月減到15磅佢就獎勵我1000蚊，佢話如果7月1日減唔到15磅就要我俾返500蚊佢喎，原本我自己減10磅系1毫都無，純粹系為自己健康和外觀而減的，但依家有人獎勵我，我梗系要加倍努力喇^O^……我同自己講一定要努力做到俾老公睇之餘，仲要挣埋佢果1000蚊！嘻嘻……結果我真系做到……哈哈……好開心囉！減到肥之餘又有錢收，真系好爽！*^O^*

蔬菜湯材料

金銀蛋肉碎節瓜湯，香煎三文魚，荔枝，大節瓜

今晚呢個滾湯好好飲，奶奶昨日拎佐一箱荔枝同埋一個大節瓜俾我，所以今晚就拎佢黎滾湯，今朝買ge三文魚好大塊呀，咁大塊都系5O蚊咋，煎香加小小甜豉油食真系好正！有一大盒荔枝我有排食，爽呀……我好鐘意食荔枝架，哈哈！

欖菜肉碎炒豆角，咸魚蒸肉餅，煎紅肠

炒親豆角我最鐘意用欖菜炒，用佢黎炒特別惹味，雪櫃有小小唐芹用净所以放埋落去炒，加佐唐芹炒香好多，好好味！咸魚肉餅用黎送飯真系一流，唔洗講！紅肠系煎黎俾两個小朋友食的。

回鍋肉，煎釀三寶，海鮮炒西芹

上星期煲蔬菜湯剩佐半個椰菜，系冰箱揾到一舊仔已經熟佐嘅腩肉，諗住用腩肉炒就算，突然諗起回鍋肉呢個餸，所以自己嘗試下炒，點知炒出黎出奇地好味，原來豆板醬炒椰菜系好好味，老公都話碟椰菜炒得好惹味，仲有至愛煎釀三寶，可惜佢唔多鐘意西芹(¬_¬)"

香辣豆豉蒸䱽魚，罐頭鯪魚炒菜芯，原粒辣味豆豉

前幾日朝早系新北江行過見到有個人賣雜貨的，我見佢d乾玫瑰花同埋茉莉花好靚，於是買10蚊，見佢仲有d乾果，佢仲介紹d原粒豆豉俾我，佢話豆味好香叫我試下，我試佐一粒確系好香，佢問我鐘唔鐘意辣，我話鐘意，佢話如果你鐘意辣你買呢種我自己炒過的黑豆豆豉，蒸野炒野撈麵食真系一流，好多師奶幫襯過吃完又再返黎幫襯我，於是我就買佐一包返屋企試，早2日拎佢黎蒸魚，真系好正，有小小辣但小朋友都吃到，真系好好味，阿女系咁揀d豆豉黎吃，哈哈…

甘筍青瓜咖哩肥牛卷，蠔油蝦米蚊節瓜，咖哩肥牛，大節瓜

今晚呢3碟餸都好正，平時金菇肥牛卷就包得多，但今次呢個甘筍青瓜肥牛卷，真系第一次包咋，真系好正，好好味，煎熟佐d肥牛原來入面d甘筍同青瓜咬落去仲系爽口嘅，加埋包即食咖哩做汁就更加好味，見有肥牛用剩我就加小小咖哩汁一齊炒，又系好好味，d節瓜仲好食，系奶奶自己種架，都好大個，我分佐2餐先煮完個節瓜，自己種真系好食d，拎黎煲湯，炆，炒都一樣好食！

日式咖哩肥牛，小唐菜，超抵雪糕

前晚老公唔系屋企吃飯，我就求其煮2碟就算喇，两個小朋話d咖哩好好味喎，阿仔就專揀肥牛黎吃，而阿囡就唔食肥牛專揀西芹紅蘿蔔黎吃，佢两個真系絕配……哈！月頭行百佳見到Haagen Dazs做特價，真系好抵，我即刻買佐返屋企！

魚條韭菜花炒蛋，香煎蒜香雞翼

今次買佐3扎韭菜花好嫩，切小小就可以炒黎食，我試過買d韭菜花好鬼老，切佐一隻手指咁長都老，完全唔好食，好左今次買呢d好好，唔知系咪當造ge關係呢！煎蒜茸雞翼簡單好味，就系用簡單調味料去醃一晚，用蒜粉，鹽，生抽，辣椒仔醃一晚已經好入味，用平底煎pan煎一滴油都唔洗用，用細火煎熟就搞掟食得！