日式檸檬芝士蛋糕

對上兩個星期5月15日整的芝士蛋糕好核突， 唔想俾人，

過佐2日<18號>我又整過，終於似樣了，

但……都系有d美中不足，有裂紋(>﹏<)  

送給朋友的
檸檬芝士蛋糕

猴頭菇响螺雞湯

呢隻雞系我家姐奶奶自己養的，原本系一隻雞黎的，我上次已經煲左半隻雞，剩返半邊昨日就拎黎煲响螺頭，呢半邊雞煲佐45分鐘都煲唔爛，好勁！我完全無加鹽，個湯都好甜，呢個湯煲出黎真系好甜，好好飲……

流浮山吃海鮮

5月19日(星期一)放低一對仔女，老公同我去流浮山同佢d同事一齊吃海鮮，都好多人食，加埋有3圍枱，d海鮮真系好新鮮好正，全部都大大碟……老公同我講系佢d同事自己去買海鮮俾人加工的，買左2條花尾龍躉合共60幾斤重，龍躉3食，果晚净食龍躉肉都食到好飽，果碟炸鮮魷好正，一上枱無耐就無晒，哈哈…(^ω^) 果晚d餸真系好正～ 咁多海鮮吃仲要碟碟大大碟，位位3舊水，出去酒樓食呢d餸一定唔止呢個數目，300蚊一位真系好抵食！

( 仲有一個魚湯同埋每枱2碟龍躉肉炒西芹，我無影到相放出黎 )

薑葱蒸大鮑魚

蝦醬煎腩肉，腿片炒西芹，火腿蛋炒飯

無食腩肉一排，今日又黎整腩肉食，老公話想用蝦醬黎整，開頭念住蒸就算，但系念念下如果蒸黎食，食唔晒，下餐就唔系咁好食，一於用煎ge方法，香口得黎又好味，有剩留到下一餐都會好食d……一於咁話用蝦醬生煎，雪櫃有冷飯剩所以求其炒個飯，炒碟西芹就搞掟……

白灼紅海蝦，凉瓜炒蛋，蒜蓉西蘭花，勁薑蕃薯糖水

係街市見有呢d紅海蝦，唔貴，4O幾蚊一斤，平平地買佐半斤試，味道都oK，可惜d蝦細隻佐少少………感覺無麥肉咁樣，凉瓜炒蛋净我同老公吃，兩個小朋友完全唔食，佢地食西蘭花(^ω^)

蕃薯糖水系老公指定要我煲俾佢飲的，老公仲話要落多薑落多薑，我真系聽佢講放佐好多薑片，最後個糖水真系好辣，辣到兩個小朋友飲唔到呢個糖水，講直我都覺得好辣(>﹏<)

焗鴛鴦雞翼，欖菜腸仔炒青瓜

我好鐘意睇飲食節目，土匪雞翼我系睇肥媽【食平DD】節目果度學返黎的，2磅雞翼整佐2種味，一種系原味雞翼，另一種系土匪雞翼，之後就求求其其揾d野炒碟青瓜就算～呢两碟餸簡單得黎……都唔錯，好味！

椰汁粟米糕

前排好中意睇TVB肥媽節目【食平DD】我見呢個粟米糕做法簡單，一於跟肥媽的做法黎整～*^O^* 味道唔錯！

川貝虎乳零芝蘋果瘦肉湯

盈盈有两聲咳唔食得芒果布甸，想佢快d好返，可以食布甸，於是要煲d湯俾佢飲下！呢個川貝湯真系好甜，似糖水多過湯，哈哈……今次我一粒鹽都無加落去，就咁飲……好清甜！呢個湯煲俾有咳ge大人或小朋友飲真系好好的，小朋友一定唔會抗拒呢個湯，我覺得呢個湯止咳化痰功效好好！

芒果布甸

琴日媽媽節整得，用佐一盒芒果啫喱粉整佐4杯，好滑，好香，第一次整整到咁ge樣算唔錯了……嘻嘻！盈盈有两聲咳所以只可以睇但系無得食……＼(^o^)／見佢咁想食我最後都俾佐一細啖佢食^o^

薯仔炆豬軟骨，欖菜肉碎炒四季豆，肉碎豆角蛋炒飯

佳寶豬軟骨做特價，我買佐一d，

念住雪櫃仲有條白蘿蔔用佢黎炆豬軟骨，

大事不妙竟然系花心蘿蔔喎，唉……激死……

唯有用薯仔頂上……哈哈！

浸青梅酒

我同老公都中意飲梅酒，今年繼續浸返两樽，其實我想浸多2樽架，可惜我無地方安置佢地…….d梅酒浸得越耐越香醇，越好飲……屋企有一樽已經浸佐2年的梅酒，果日拎出黎飲真系好好飲，同浸佐1年ge梅酒相比真系差好遠～上個月尾我出去元朗買野時見到d青梅大大粒又靚先20蚊2磅，所以買左4磅返屋企浸，其實有d系20蚊3磅架，不過細粒小小同埋無咁靚囉！浸酒我個人認為用大粒黎浸會好d……青梅上面d芒果都好鬼死靚，都系賣20蚊咋，我咁中意芒果更系唔會錯過喇……最終都買佐一份返屋企食 ^^ d芒果我食晒喇～超甜呀！

粒粒梅都好靚
2o蚊2磅

紐約芝士蛋糕，日式芒果芝士蛋糕

前幾日5月1日假期得閒無野做，成個下午走去廚房搞搞震……見早排買佐2舊忌廉芝士仲末用，於是拎佢黎整蛋糕食……哈哈，一系唔整，一整就整佐2個，放雪櫃有排食……想食隨時有得食真系好好！超正呀～

千島芝士海鮮Pizza ， 芝士蘑菇串燒雞Pizza，蟹籽青瓜沙律，蟹籽雜果薯仔蛋沙律

昨晚我又做無飯煮婦，又唔想煮飯食，突然想吃Pizza，系街買pizza貴到死，唔抵食～為佐慳家，一於自己郁手整黎食……新鮮出爐Pizza真系好好食，好食到我地争住食！两三下就將一大一細Pizza清得一乾二淨……太好味了！