2016年4月28日星期四

自家制壽司卷,午餐餐盒

上星期三整佐呢d壽司俾兩姐弟帶返學做午餐,第一次試整好彩都成功整到,两姐弟都話好食下次再整,嘻嘻……自從今年學校開學時轉佐飯商,阿囡就話學校d午餐唔好食仲越來越難食,不停叫我送飯俾佢食,我開頭都唔肯送,但眼見阿仔同阿囡d同學仔好多人都系由訂飯之後轉自己帶飯返學校食,可想而之呢間飯商d飯餸真系有幾咁好食,所以我系新年前就開始煮飯拎去學校俾佢地食,原來我送飯都送佐2個幾月了……除佐星期三要早起身整午餐之外,其他日子都系我中午11點幾煮好飯送去學校俾佢地食的,因為阿囡學校逢星期三系放早放2:25分的,我唔想12點送完飯,之後返屋企休息1個鐘左右2點又去要接放學咁辛苦,所以逢星期三就一早整好d午餐俾佢地一齊帶返學校食,逢星期三我多數整三文治,炒飯,炒烏冬等……

2016年4月19日星期二

金菇炒肥牛,豉油皇雞翼/豆腐,玻璃生菜

日頭簡單炒碟金菇肥牛,煮小小豉油雞翼,之後夜晚就加幾舊炸豆腐落去再煮幾煮,加碟菜……咁就一日,放假盡量簡單(^_-)嘻嘻!

2016年4月5日星期二

冬菇紅棗杞子雲耳蒸雞,上湯灼白菜,豬扒

 唉……放假嘅時候習慣佐夜訓,朝早訓到成10點先起身,今晚又系一樣夜訓,其實我一早已經系床度但訓唔著,唯有拎電話訓系床度睇電視,睇完電視依家就寫吓野,寫完真系要訓因為明天要送小朋友返學,之後又要送飯盒俾兩姐弟真系有排忙,諗起都煩,想繼續放假……哈哈!下午4點幾突然想食糖水,咁岩上星期婆婆俾佐個細芋頭我,反正屋企有椰汁同西米,一於整反煲返个糖水食吓先……(^_-)開始眼訓了,要快d去訓……早抖!

2016年4月4日星期一

紅蘿蔔粟米合掌瓜雞腳湯,焗糖醋骨,辣肉腸蕃茄炒蛋

第一次買合掌瓜黎煲湯,原來煲出黎d湯都幾清甜,我仲記得第一次吃合掌瓜果時系結婚無耐同奶奶一齊住嘅時候食的,佢買黎炒肉片,我吃佐2塊已經唔鐘意食,當時我系唔知果d叫合掌瓜架,因為我結婚前我無見過我媽買黎食,所以我唔識(^_-)……今次又搞搞新意,將煮糖醋骨的汁料同金沙骨撈匀放雪櫃醃一晚,第二日用焗嘅方法黎整,效果好好,好入味,呢個方法真系唔錯,將已醃好嘅糖醋骨放落焗盤200度焗熟即可以,真系方便,快靚正!

2016年4月2日星期六

香辣肥牛年糕炒椰菜,金菇牛肉卷,瑞士汁雞翼,腐竹蛋糖水

早幾日阿女無啦啦同我講話想食年糕,我就買佐一包細嘅俾佢食,年糕本身系一d味都無嘅,系要靠d汁俾味佢的,我自己多數系蒸排骨果時用年糕墊底,咁d年糕就會吸佐d汁咁就會好好味,但今次試下放埋落菜入面一齊炒,比我想像中好食!

2016年4月1日星期五

開心復活節@ 沙田,尖沙咀,長洲

足足2個星期嘅復活節假期話咁快就過佐大半了,仲有3日就結束……呢個假期過得好愉快,不停同兩個小朋友去玩,佢地就好開心我就好攰,做家長系咁㗎喇,無辦法~放咁多日假無可能日日留系屋企,放假頭一星期成日落雨陰天潮濕,煩到爆~難得呢個星期好天我地一於要玩盡佢,27號約佐同學仔去沙田snoopy公園玩同埋行街吃野,休息佐1日……再去玩,29號約佐大表哥去尖沙咀買鞋同行街,之後第二日又1家4口去長洲玩,4月1日又去佐姑媽屋企玩,玩足成個星期咁制,真系開心!
3月27日(沙田snoopy公園)