香芋臘味糯米飯

 🍂🍂秋風起又系時候吃臘味喇😬今日整返一煲香芋臘味糯米飯食下先，一開飯煲盖就閒到香噴噴芋頭香味同臘味嘅香味味~ 有味飯真系好好食，臘味其實好隨意的，你喜歡咩臘味都可以放落去，我今次放臘鴨脾，瑶桂臘腸，香芋，粘米與糯米系2比1，糯米唔需要浸嘅，直接煲，同平時煮飯一樣，只系煮佐一半時間就放材料落去繼續煮到飯煲好，最後加小小煲仔飯豉油落去撈勻即可以食！

老豆生日

上年疫情嚴重無同老豆同媽媽慶祝生日，今年疫情好返d我地就約埋一齊去同老豆食飯慶祝，一家人坐埋一齊食飯有講有笑好開心好幸福！祝老豆生日快樂，身體健康，日日都開開心心，希望疫情快d結束!

雙菇雲耳蒸滑雞(附食譜)

我大大話有年幾2年無用雲耳蒸過雞喇，前排系新北江買佐隻冰鮮黄油雞， 呢款黄油雞嘅肉質好好食，佢d肉唔系腍啤啤架，食落口好有咬口，系走地雞嘅質感，食落口完全系新鮮雞嘅質感好有雞味同甜味，推廣價55蚊一隻好抵食 ，果度嘅老闆話貨量唔多，賣晒就無，我有一次去買好早已經話賣晒，我今次系第二次去幫襯佢，今次一買就去買，仲買佐2隻添，一隻系老闆推介嘅黄油雞，已買過黎食好食再買，另一隻系麻香雞(老闆話呢款肉質更好)，今次系用黄油雞，用佐半邊黎蒸，已經有一大碟喇，老公話好好食，其實上次買黎煮咖哩同煮雞酒，試過質地好好，所以今次用佢黎蒸，哈哈 ~ ~ 好好食 ! 

洋蔥木耳榨菜肉絲上海麵

 😋洋蔥木耳炒榨菜肉絲😍好香呀~ 🤤 前一日夜晚炒定第二日起身煮個麵就可以加d落去食😁 我自己鐘意一次過炒多d用玻璃盒裝住放雪櫃可以慢慢食 💯 朝早起身煮個米粉或者麵加小小落去好好味架，我兩個小朋友好喜歡，佢除佐配粉麵一齊食之外仲可以做餸，我間唔中都整嘅，但好似好小記錄低，呢個榨菜肉絲用黎送飯食超級正架，唔洗多小小就可以食到一大碗飯架!

家庭版海南雞飯，麻辣牛肉炒雜菌，上湯浸豆苗

 簡易家庭版海南雞飯 ，d黄薑飯超級正 ， 我哋一家四口都好喜歡呢個黄薑飯，佢真系好香好好食，跟住用麻辣紅油醃牛肉，拎黎炒雜菌 ，麻麻地辣辣地幾好味，兩姐弟好喜歡，再黎整多碟上湯浸豆苗，簡單便是最美味!

海南雞黄薑飯，豉椒炒血丸子，香蒜炒紅莧菜

好耐好耐之前我好似有整過海南雞飯，但今次整系用新鮮雞黎整，味道真系一流唔錯唔錯，雞同飯d顏色都好靚仔，d雞我一早用d粗鹽醃佐幾個鐘，d雞肉充滿咸香味，唔洗點醬都好好食，净食黃薑飯都好正好香，再加上大嫂俾的湖南特產「血肉丸子豆乾」用尖椒炒小小辣超惹味，真系正到爆! 但系呢個特產唔系個個喜歡食，因為佢嘅燻味勁重的，我老公唔鐘意果陣煙燻味，所以佢唔喜歡食的，但我同對仔囡就好鐘意食! 

臘味煲仔飯，南北杏西洋菜排骨湯

好耐無寫blog喇，趁得閒就上黎寫吓野先，嘻嘻…呢排真系忙，忙返工忙照顧家庭等等，總之就系忙喇~ 我做兼職唔覺唔覺已經有半年了，依家已習慣佐返工模式了，朝早凑完返學就返工，好在有老公接放學，咁我就唔洗咁辛苦! 兼職最好就系可以揀日子返，我系逢星期六日都唔返工嘅，哈哈~ 假期更系留系屋企陪老公同小朋友同喇!

星期六同兩姐弟行街見到呢個煲仔覺得好正，我一於買佐返屋企，見雪櫃有臘味於是乎琴晚就煮煲仔飯食，正!!! 放假當然唔少得煲吓湯飲喇，簡單咁煲佐一個南北杏西洋菜排骨湯大家一齊飲，如果有埋鴨腎就更加正，可惜我無買，哈哈~ 

豉椒榨菜木耳肉絲臘腸飯(附食譜)，南北杏青欖桔餅瘦肉湯，菜蕊

簡單又美味，快靚正……我煮親呢款煲仔飯2姐弟都要添飯，人仔細細嘅兩姐弟要食2碗飯，哈哈……細佬食佐兩啖飯話今晚d飯有小小辣，問我做咩要加辣椒落去，我話加小小辣椒片落去好味d，細佬話：媽咪你下次要食辣唔該你煮好先將辣椒片加落自己個碗度，唔好一早加，我唔得食辣，我即答系嘅系嘅……我下次加落自己碗度，細佬對唔住呀！家姐知我俾細佬話系咁笑我-_-#  家姐真系衰…… 家姐食得辣就同細佬講d飯都唔系好辣，微微辣之嘛，之後細佬又話家姐，你同媽咪都食得辣更系話好味唔辣喇，你明知我唔食得辣，你就同媽咪一齊蝦我……哼！ 我聽完細佬講野之後都忍唔住笑，哈哈~ 

另外今晚我煲佐小小止咳湯俾細佬飲，南北杏青欖桔餅瘦肉湯，衰仔呢兩日系咁咳，叫佢唔好食咁多糖，系都唔聽我講，搞到自己系咁咳，煩死人……

臘味煲仔飯，生菜，雜丸

今日系7仔買野店員問我要唔盒臘腸，佢話入面有4條有2款味道，一款系鴨膶腸，另外一款系鮮肉臘腸，見佢系鴻星出品應該唔差所以買黎試下，4條要30幾蚊都唔平……今晚一於拎佢黎試吓整煲仔飯，今次試用珍珠米黎整煲仔飯煲睇下效果系點，出黎效果同我平時煮飯用嘅泰國米差唔多，用珍珠米軟身小小，至於d臘腸我唔多喜歡，因為好甜，唔岩我口味，2款臘腸之中鴨膶腸好食小小，食落口香d軟d，鮮肉臘腸好甜同有小小硬，唔岩我！我喜歡油鴨同銀魚仔多d……因為俩姐弟唔食油鴨所以我淥生菜同時加d雜丸落去一齊淥，等佢地有餸食，今晚好簡單就整碟菜同臘味飯，加小小丸就算(^_-)簡簡單單又一餐！

木耳榨菜臘腸牛肉元貝飯

上兩個星期我諗唔到整咩餸加上天氣涼涼地，唔諗咁多一於整煲仔飯吃，快靚正，碟都洗少2隻，老公返早班中午得我同2個小朋友吃飯，我個認為冬天整有味飯(即系煲仔飯)特別正，特別好食，唔知有無人同我諗法系一樣嘅呢？兩姐弟知我煮煲仔飯第一時間叫我煮多d飯，佢地要多飯，仲話要留一大碗飯等爸爸放工返黎吃，上次我煮得太少飯我同兩個小朋友清晒，老公放工返到屋企兩姐弟不停同爸爸講媽咪煮d煲仔飯好好食，吃晒無留俾爸爸你食，搞到爸爸唔開心，净系得個聽字，無得食，哈哈！所以倆姐弟佢地今次叫我煮多d飯要留d俾爸爸放工返屋企食，哈哈！

豉汁榨菜臘腸肉片飯

我屋企個煮食爐系有埋煮飯功能的，但我由入伙到依家，今次都系第二次用佢黎煮飯咋，上次用佢黎煮過一次飯，都覺得佢煮出黎d飯好靚，昨日用佢煮有味飯，超正呀，煮出黎d飯真系好正粒粒分明，同煲仔飯一樣咁制，個煲佢完全唔痴飯架，如果想要有飯焦完全無問題，只要額外開火煲多5分鐘即有飯焦，用呢個煲黎煲飯系一粒飯都唔洗浪費！兩姐琴日話呢個飯好好味，好味過我平時煮果d多多聲笏，佢兩個竟然要添飯每人吃佐2碗飯，真系少見，可想而之呢個飯系幾咁正！

冬菇臘味糯米飯

每年冬天我例牌會煮糯米飯食的，我地一家大細都喜歡食，我最唔鐘意系街買嘅糯米飯黎食，因為超級多油，每次食完d糯米飯你就會見到個碗底多油到嚇死人，所以我喜歡自己煲糯米飯食嘅原因就系咁樣！我自己系屋企煮系將d臘腸臘肉先飛水再切粒之後仲會用平底鑊炒香等炒出佐d油份出黎唔要d油，再加蝦米乾蔥碎一齊炒香先至放系米上面最後加埋冬菇放系米上面一齊煲，跳製後加豉油調味即可，自己煲盡量少油，咁樣就會健康d，我自己喜歡用2份粘米加1份糯米溝埋一齊煲的，我覺得咁樣好食d，净糯米我覺得唔好～哈哈！

冬菇蝦米臘味糯米飯

前晚我整佐盈盈喜歡食的糯米飯，
阿囡話好好味喎，好味到要添2次飯，
老公話：好味都唔可以再俾阿囡再添食呀！
飽死佢呀………哈哈………
我自已都覺得好味，阿囡問我點解咁好味？
我答盈盈 : 媽咪用佐浸蝦米，冬菇的水用黎煲飯，梗系好味喇…… 係咪好正呢 ? 
盈盈話 : 係呀 , 好好味好好味....... 好正 , 
下次記得又要咁樣整喎 ^0^