豉椒榨菜木耳肉絲臘腸飯(附食譜)，南北杏青欖桔餅瘦肉湯，菜蕊

簡單又美味，快靚正……我煮親呢款煲仔飯2姐弟都要添飯，人仔細細嘅兩姐弟要食2碗飯，哈哈……細佬食佐兩啖飯話今晚d飯有小小辣，問我做咩要加辣椒落去，我話加小小辣椒片落去好味d，細佬話：媽咪你下次要食辣唔該你煮好先將辣椒片加落自己個碗度，唔好一早加，我唔得食辣，我即答系嘅系嘅……我下次加落自己碗度，細佬對唔住呀！家姐知我俾細佬話系咁笑我-_-#  家姐真系衰…… 家姐食得辣就同細佬講d飯都唔系好辣，微微辣之嘛，之後細佬又話家姐，你同媽咪都食得辣更系話好味唔辣喇，你明知我唔食得辣，你就同媽咪一齊蝦我……哼！ 我聽完細佬講野之後都忍唔住笑，哈哈~ 

另外今晚我煲佐小小止咳湯俾細佬飲，南北杏青欖桔餅瘦肉湯，衰仔呢兩日系咁咳，叫佢唔好食咁多糖，系都唔聽我講，搞到自己系咁咳，煩死人……

豉椒肉絲榨菜木耳絲臘腸飯做法都好簡單：先切好d肉絲同臘腸，再拍一粒蒜頭切成蒜蓉，豆豉洗乾淨，之後加調味去醃肉，用1匙羹紹興酒，半匙羹鹽，小許胡椒粉，1匙羹生粉，2匙羹水，1匙羹乾辣椒片，小許粟米油，蒜蓉豆豉全部材料撈匀，最後加一包即食榨菜木耳絲落去再撈勻就可以，屋企無我呢款煲的話(可改用電飯煲或瓦煲)都可以做到，洗好d米加適量水按制煲飯，煲5分鐘後就加已醃好嘅肉同臘腸落去繼續煲至飯好為止！