Tiramisu蛋糕@媽媽生日

呢個月中12月17日系阿媽舊曆正日生日，原本我唔打算整蛋糕的因為前排好忙，但收到家姐信息問我阿媽生日整唔整蛋糕，我話呢排都忙有野做，佢話你忙到蛋糕都整唔到呀？我話咁又唔系，哈哈……佢話如果你整到你就整一個焗紐約芝士蛋糕喇，我好想食你整嘅蛋糕，你整得好好食，系出面買果d無咁好食呀！我話你開到聲想食我一定整，難得你喜歡食^O^……隔佐一日我問家姐我整另一款蛋糕好唔好，佢話總之系你整就咩都好，無所謂你整親咩蛋糕都好食，我對你整嘅野有信心……我話唔系架，我今次試整Tiramisu系我3年前整過一次味道幾好，今次再整唔知成唔成功架，家姐就話oK喇多數成功無問題！哈哈…俾家姐笑死，佢對我整嘅真系好有信心……佢越對我有信心我反而更擔心做得唔好，我唔理咁多随心去做……好彩最後都成功見得下人！我自己就覺得一般，因為面頭d忌廉吱到大細不一有d丑樣，同埋個蛋糕高度好似矮佐小小，另外其中一粒忌廉仲俾我壓爛佐添……嘻嘻～ 總體黎講都ok😛個個試食完Tiramisu都話好滑好好味，只系手指餅果度甜佐小小，如果淡返小小會更加完美！另外芒果蛋糕系大嫂買的^o^……我屋企人都好鐘意吃芒果！

勁薑蕃薯糖水+水晶湯圓

簡單得黎又好味嘅糖水，我同老公都好鐘意勁薑味嘅蕃薯糖水，嗅味相投，哈哈……老公無啦啦話想食湯圓，咁岩冰箱有湯圓，所以加埋落去，原本系三色水晶湯圓黎嘅，其中一款系黑芝麻味，因為黑芝麻好味一早俾我地食晒，其他味一般所以剩返綠茶同紫薯味放系冰箱足足放佐幾個月都無煮黎食，咁岩老公話想食湯圓所以今晚煮晒佢……順便清一清雪櫃空返d位置出黎～ 嘻嘻！

聖誕快樂@2016

聖誕節終於到了……☃平安夜之聖誕大餐☃系嫲嫲屋企過……😙多謝👨👩伯伯，伯娘送俾小朋友嘅聖誕禮物🎁🎁………仲有爸爸送俾我地嘅零食🍭🍫🍬🍪🍩……做小朋友👫真開心❤有聖誕假放之餘又有禮物收，真系爽……另外今日見有時間仲整佐一個細細個6吋Tiramisu蛋糕一齊食 仲叫佐d外賣返屋企食，等大家開心吓……嘻嘻！

我在此祝大家：聖誕快樂，身體健康！

聖誕曲奇(附食譜)

又到聖誕……又到聖誕……每逢聖誕節小朋友就最開心㗎喇……有得開聖誕party之餘又有長假放，真系爽……兩姐弟年年聖誕大食會都要求我整野食拎返學校同老師同學仔一齊分享！
(^_-)姐姐今次要求我整曲奇，仲要系有裝飾嘅曲奇，曲奇我識整，但要裝飾真系考起我囉-_-" 第一次試做糖霜，仲要系曲奇上劃裝飾……呢d曲奇用佐我2日時間先完成到，好彩成功咋~ 兩姐弟學校前日21號開聖誕party……每人拎佐一盒曲奇返學校開大食會，佢地話同學仔好中意食，兩三下就吃晒盒曲奇，最受歡迎系朱古力味……盈盈放學返黎同我講老師讚佢d曲奇整得好靚好有創意同埋好好味，盈盈答老師曲奇系我媽咪整嘅，曲奇嘅表情系我劃嘅……哈哈～ 我真系俾盈盈吹漲，呢條友仔真系識領功！ (^o^)

芝士咸牛肉豬仔包

上星期五同老公去華嫂度食早餐，老公話試招牌野
老公佢揀佐招牌芝士咸牛肉豬仔包黎試，仲話唔錯添
但我個人覺得19蚊一個，好似貴佐dd咁囉～

想食【華嫂冰室嘅招牌芝士咸牛肉豬仔包】話咁易
今日突然想食………唯有買幾個豬仔包自己郁手整
自己整又平～又靚～又好味👍👍👍經濟又實惠
加埋杯熱辣辣☕熱咖啡……一啖包一啖咖啡……正！
又唔洗山長水遠行路去或搭車去朗山排隊等食……

豉椒榨菜木耳肉絲臘腸飯(附食譜)，南北杏青欖桔餅瘦肉湯，菜蕊

簡單又美味，快靚正……我煮親呢款煲仔飯2姐弟都要添飯，人仔細細嘅兩姐弟要食2碗飯，哈哈……細佬食佐兩啖飯話今晚d飯有小小辣，問我做咩要加辣椒落去，我話加小小辣椒片落去好味d，細佬話：媽咪你下次要食辣唔該你煮好先將辣椒片加落自己個碗度，唔好一早加，我唔得食辣，我即答系嘅系嘅……我下次加落自己碗度，細佬對唔住呀！家姐知我俾細佬話系咁笑我-_-#  家姐真系衰…… 家姐食得辣就同細佬講d飯都唔系好辣，微微辣之嘛，之後細佬又話家姐，你同媽咪都食得辣更系話好味唔辣喇，你明知我唔食得辣，你就同媽咪一齊蝦我……哼！ 我聽完細佬講野之後都忍唔住笑，哈哈~ 

另外今晚我煲佐小小止咳湯俾細佬飲，南北杏青欖桔餅瘦肉湯，衰仔呢兩日系咁咳，叫佢唔好食咁多糖，系都唔聽我講，搞到自己系咁咳，煩死人……

臘味煲仔飯，生菜，雜丸

今日系7仔買野店員問我要唔盒臘腸，佢話入面有4條有2款味道，一款系鴨膶腸，另外一款系鮮肉臘腸，見佢系鴻星出品應該唔差所以買黎試下，4條要30幾蚊都唔平……今晚一於拎佢黎試吓整煲仔飯，今次試用珍珠米黎整煲仔飯煲睇下效果系點，出黎效果同我平時煮飯用嘅泰國米差唔多，用珍珠米軟身小小，至於d臘腸我唔多喜歡，因為好甜，唔岩我口味，2款臘腸之中鴨膶腸好食小小，食落口香d軟d，鮮肉臘腸好甜同有小小硬，唔岩我！我喜歡油鴨同銀魚仔多d……因為俩姐弟唔食油鴨所以我淥生菜同時加d雜丸落去一齊淥，等佢地有餸食，今晚好簡單就整碟菜同臘味飯，加小小丸就算(^_-)簡簡單單又一餐！

香蕉蛋糕(附食譜)

屋企有2條熟到起晒梅花黑點嘅香蕉🍌🍌🍌無人食😑
🤔掉佐佢好浪費 😊……拎黎整蛋糕消滅佢😜😜😜
衰仔謙謙🙎將舊蛋糕壓到扁一扁佢先食😒頂佢唔順……😏頂佢唔順……😏

木耳榨菜臘腸牛肉元貝飯

上兩個星期我諗唔到整咩餸加上天氣涼涼地，唔諗咁多一於整煲仔飯吃，快靚正，碟都洗少2隻，老公返早班中午得我同2個小朋友吃飯，我個認為冬天整有味飯(即系煲仔飯)特別正，特別好食，唔知有無人同我諗法系一樣嘅呢？兩姐弟知我煮煲仔飯第一時間叫我煮多d飯，佢地要多飯，仲話要留一大碗飯等爸爸放工返黎吃，上次我煮得太少飯我同兩個小朋友清晒，老公放工返到屋企兩姐弟不停同爸爸講媽咪煮d煲仔飯好好食，吃晒無留俾爸爸你食，搞到爸爸唔開心，净系得個聽字，無得食，哈哈！所以倆姐弟佢地今次叫我煮多d飯要留d俾爸爸放工返屋企食，哈哈！

串燒雞芝士雜菜包

今日繼續post整麵包嘅相……整包真系會整上隱架，上月尾整完排包之後過佐一兩日我又整佐以下呢款串燒雞芝士雜菜包，倆姐弟同老公超級喜歡食我整呢款包，我屋企所有人都好鐘意食呢d串燒雞，嘻嘻……依家我拎佢黎整包，仲要系一個包放一串燒雞落去再加埋芝士，嘩……正到爆！所以我整親呢款包都好受歡迎！人仔細細嘅倆姐弟早餐一人要吃2個串燒雞芝士雜菜包同埋一杯朱古先夠，哈哈~ 真系好擦得好擦得！

湯種鮮奶排包，芝士蟹柳包，脆皮芝士腸仔包 (附食譜)

上個月尾整嘅包，依家先得閒post出黎，嘻嘻……今次好滿意自己整嘅排包，同一款麵團整佐3款包，第一款系排包，第二款系芝士蟹柳包，第三款系脆皮芝士腸仔包，第二三款d包好快就清晒，第三款包就無人想食，兩姐弟話排包無餡唔鐘意，之後我又要諗方法黎消滅d排包，系排包上加d芝士紫菜肉鬆放系排包上面再焗，焗完出黎2姐弟食到拇指大動……佢地話好好味喎！加佐湯種整出黎d包確系軟熟！

鹽燒烏頭，蝦籽藕餅(豬肉)，上湯白菜仔

😂超級搞笑嘅盈盈，琴晚發生嘅事…笑鬼死我😅😅😅

話說琴晚系我第一次試整【鹽燒鳥頭】😋我系廚房整野，盈盈做完功課走入廚房系我隔離睇我整，見我用蛋白撈鹽好似好好玩咁，佢話要幫我整，之後見到我用d鹽將成條魚包住，佢話條魚俾我包完之後好似座山墳😂😂😂要拜吓條魚等佢安息😂哈哈……到我拎條魚去焗果時，佢走佐出廳叫細佬入廚房睇下仲叫細佬同佢一齊拜條魚😏傻得好緊要……😄真系頂佢唔順，笑死我😅……過佐一陣又去叫爸爸一齊去拜……爸爸竟然同佢地傻埋一份一齊拜……哈哈😂😂😂

⛼琴晚條鹽燒烏頭🐟好正👍👍👍好好味👅 d魚肉好鮮甜，配普寧豆醬食好味，再淋埋小小🍋檸檬汁更加好食！原來自己整好簡單架咋，出街食一條鹽燒烏頭最少要100蚊，自己整超級抵食！老公👦話好食，開埋罐🍺啤酒配魚一齊食仲正喎😄

# 喜歡食魚嘅朋友試下自己整喇！做法亦好簡單架咋，材料：一條魚，2包粗鹽，2隻雞蛋(要净蛋白) ，買魚叫人唔好打魚鱗(要保留鱗) 條魚洗乾淨魚肚用小小胡椒粉同鹽醃一醃加2片薑就得，蛋白用筷子打到起泡同粗鹽撈匀，之後拎d粗鹽包住成條魚拎去焗，用高火250度焗20分鐘，食得！

朱古力紙杯蛋糕(附食譜) ，紫薯鮮奶紙杯蛋糕

呢個月頭9號就系兩姐弟學校秋季旅行日子，家姐同細佬去嘅地方都唔同，家姐高年級去北潭涌度假營玩而細佬系低年級組就去大埔海濱公園玩，呢2姐弟一個叫我整麵包而另一個就叫我整蛋糕仔，我同佢地講一系2個一齊帶迷你麵包或者2個一齊帶蛋糕仔，結果佢2個話要蛋糕仔，仲要指定要朱古力味同紫薯味！我個人覺得朱古味好食d，紫薯蛋糕d色唔夠特出，完全無顏色，吃落口無只系有輕微蕃薯味·……

香芋炆臘鴨脾，涼拌昆布，隻魚炒娃娃菜魚

冬天吃臘味系最正嘅，每年冬天我都食唔少同埋肥佐唔少，過完一個冬季起碼肥2~8磅，有時唔止呢個磅數添呀，哈哈大笑：P …… 因為天氣冬嘅關係我自自然然會食多佐，把口特別放肆，不停食……一到轉季我就會好努力咁控制自己把口，食少d或者飲下蔬菜場黎減磅架喇，講返正題先，琴晚用臘鴨脾炆芋頭超級正，d芋頭好粉，太好味嘅關係我無食飯净食芋頭臘鴨同菜咋，嘻嘻…… 我第一次用臘鴨脾炆芋頭，驚兩姐弟唔喜歡食，所以整佐碟涼拌海帶絲俾佢地食，炒菜仲特登加d魚片同豆豉魚落去一齊炒，等佢地有餸食，估唔到2姐弟都食芋頭，但佢地唔食臘鴨，而阿囡就好喜歡碟涼拌！

鮮奶燉蛋白

呢個燉蛋白失敗得好緊要……唉……去轉廁所就出事，蒸過龍……老得制d蜂巢出晒黎，須則系咁，但味道還是很好！下次一定要set好時間制先去廁所……哈哈！

冰糖紅棗雪燕糖水

一連2晚都煲雪燕糖水飲，就快肥屎了……之前睇肥媽飲食節目佢介紹過雪燕，聽講同燕窩質地差唔多，咁岩我行街見到有雪燕賣買佐小小，買佐1両咋，賣嘅姨姨話系拉絲雪燕小小就可以發到好多，我前日發佐15克，發完出黎好多，我又驚唔好食，所以將發好嘅拎一半黎煲，煲佐小小試佐先，真系估佢唔到，好正，吃落口質感真系好似燕窩(^_-)下次試下用鮮奶整，可能更加正！

西洋菜鴨腎豬骨湯，冬菇栗子炆雞翼，白灼小白菜

奶奶俾佐一扎西洋菜我，見佢好靚，拿拿林買d鴨腎返黎煲西洋菜湯，老公話好清潤好好飲！冬菇栗子炆雞翼送飯食真系好正！

螞蟻上樹，咸魚蒸肉餅，蒜茸炒生菜

螞蟻上樹呢味餸簡單好味，用自己整嘅XO醬黎煮，真系好香多正，再黎多碟老公至愛嘅咸魚蒸肉餅，嘻嘻……咁樣簡簡單單又一餐！

蝦滑蒸嫩豆腐，味菜牛柳絲

第一次買蝦滑，原來d蝦滑一d都唔平，要80蚊1斤，20蚊得4両咋，俾我個拳頭仲要細，新鮮牛仲貴，我叫人切20幾蚊俾我，嘩……真系小得好緊要，d牛柳肉太貴所以要用多d配菜一齊炒先至得，有菜又有肉咁又可以做一做餸，唔洗諗咁多，確系幾好！

黄豆涼瓜脊骨湯，蒜茸豆豉尖椒炒肉絲，煎鯖魚，白灼菜蕊

黄豆涼瓜湯我好小煲架，因為我2個小朋友唔鐘意飲呢個湯，今次呢個湯系老公叫我煲俾佢飲嘅，識我嘅人都知我唔喜歡吃魚的(除佐三文魚)哈哈…… 須則我唔喜歡吃魚但我都間唔中買魚整俾2姐弟吃既，但只限於一d簡單易整同埋無咩細骨嘅魚我先會買黎整架，嘻嘻~ 兩姐弟都幾鐘意食鯖魚！！

豉汁榨菜臘腸肉片飯

我屋企個煮食爐系有埋煮飯功能的，但我由入伙到依家，今次都系第二次用佢黎煮飯咋，上次用佢黎煮過一次飯，都覺得佢煮出黎d飯好靚，昨日用佢煮有味飯，超正呀，煮出黎d飯真系好正粒粒分明，同煲仔飯一樣咁制，個煲佢完全唔痴飯架，如果想要有飯焦完全無問題，只要額外開火煲多5分鐘即有飯焦，用呢個煲黎煲飯系一粒飯都唔洗浪費！兩姐琴日話呢個飯好好味，好味過我平時煮果d多多聲笏，佢兩個竟然要添飯每人吃佐2碗飯，真系少見，可想而之呢個飯系幾咁正！

糖不甩

今日突然心血來潮想食甜野，想煲糖水但又唔願郁，唯有整d簡單而唔需要太多時間嘅小食，打開廚櫃見有成分糯米粉未開過，一於黎個糖不甩，做法簡單又快又好味，整小小已經夠食，因為系糯米製造如果吃得多會好飽好制！我唔喜歡出街食糖不甩，因為街果d糖不甩整得一d都唔好食，d粉軟諗諗難食到暈，街食果d好多都系將d無餡湯圓煮好不起再加d糖粉花生碎芝麻碎咁樣俾你撈埋黎食，我超唔鐘意！我自己整嘅無餡湯圓仔系好煙韌的，用片糖水煮熟煮到收晒水不起加花生碎同蛋絲一齊食，超正，又香又甜又好味！正……兒時的味道，我細細個果時阿媽好常整俾我地食的！

滷水拼盤(豆腐，蛋，雞脾)，蒜香腐乳生菜

一係唔整一整就整多D , 黎返個滷水拼盤(豆腐，蛋，雞脾) 呵呵~ 整多碟菜咁就食得飯了!

自家制XO醬

我對上一次整X0醬已經系2年前嘅事，之前整果d一早已經食晒，我一路都話整一直都話整返d放系度煮麵食時加d落去特別香特別好食，之但系我講就講佐成半年，但無實際行動去整，呵呵～ 真系講就天下無敵做就有心無力，上星期我終於的起心肝整佐喇……嘻嘻，今次我額外買佐d金華火腿切粒加埋落去整，更香更惹味，仲用佐奶奶自家種嘅指天椒去整，正……我放佐咁多指天椒出黎效果都唔系太過辣，連阿仔阿囡都食到！今次呢兩樽大大樽有排食……想知點整按一按這裏＝＝＞ XO食譜  按完便可以參考我之的做法！份量是可加可减的隨意就可以，不一定要跟足，我自己都系隨意架咋！

香辣滷肉燥蛋，火腿娃娃菜，上海肉燥麵

做家庭煮婦最煩就系日日要諗買咩餸煮咩餸，真系煩死人…… 我自己好喜歡買定d急凍餸同罐頭放系屋企以避不時之需，我姑奶黎過我屋企見到我冰箱都嚇一跳，佢話我一星期唔落街都餓唔死我地一家口，哈哈……確實如此，今次煮呢個肉燥d肉都系我平時用剩小小肉就放上冰霜，儲儲埋埋唔少早幾我執冰箱就執出好多，用冰鮮肉煮呢個肉燥最好，因為滷肉味道重所以用佢黎煮系最好的，煮完出黎味道效果同新鮮肉系無分別的，煮滷肉燥同時加埋d已熟去壳蛋一齊煮d蛋真系好好味的，吃剩的肉燥如短期內吃唔晒最好放返冰箱，又或者食麵時加d肉燥落去吃好正同好好食的！

乾果仁方包 (紅苺，提子，芝麻，瓜子仁，合桃)【附食譜】

風球下的方包……因為上星期五系8號球，教育局宣布所有學校停課，我兩個小朋友亦唔洗返學，早幾日已經知道星期五可能打風，咁我星期四己經買了好幾日餸，外面横風横雨，無得落街，悶悶地搵佐部麵包機出黎整下包……我估我自己應該有大半年無整過包，我再唔拎部機出黎用一用，我諗我部麵包機就快變化石了，哈哈……

校長燒肉

第一次同老公的好朋友到元朗校長燒肉度食韓燒 ~

紅蘿蔔椰子雪梨豬骨湯，香煎椒鹽三文魚，咖哩魚旦豬皮蘿蔔，金菇肥牛炒西芹

又煲清潤椰子雪梨湯……嘻嘻……昨日好似整多佐d餸，本身2個餸1個湯系夠晒食嘅，我見蘿蔔靚於是買佐d蘿蔔，同買佐小小豬皮，原本系第二日整的，但老公又話好想食咖哩魚蛋豬皮蘿蔔，我話第日煮，佢就話唔好喇不如依家煮埋佢喇，吃唔晒放雪櫃第二日食都得架，不停系咁講叫系咁叫我煮，煩死人……心諗返正豬皮蘿蔔隔餐再食都好好味，所以就煮埋佢，食剩放雪櫃！俾老公激死，煮好飯有飯佢唔食，又話想食生麵……叫我幫手煮……啍……我都費是理佢，最後佢自己煮佐~ 哈哈！

香茅豬肉撈檬，越式米紙蝦卷，牛油果沙冰，同阿囡撑枱腳

同阿囡係深水埗撐枱腳 , 哈哈 ~ ~ 牛油果超級好飲!

鮮橙汁戚風蛋糕，香芋鮮奶戚風蛋糕

又黎戚風蛋糕，今次我試整新口味，首次試整橙味戚風，家人好喜歡仲話橙味比香芋味更加好食，其實我自己都好喜歡橙戚風，我加佐d橙皮碎落去蛋糕入面一齊焗令到個味道更清新！

第一次同細佬剪頭髮

我第一次同細佬剪頭髮 , 我真的好大膽……已同老公剪第二次頭髮了, 哈哈！兩父子嘅頭都系我操刀的，還可以吧！

南北杏川貝梨亁雪耳瘦肉湯

近呢一星期大家都應該感受到一早一晚凉佐小小，秋季比人嘅感覺系一個好舒服嘅季節，但有一樣唔好嘅野就系【乾】……佢系會令人皮膚乾燥同埋好易喉嚨乾涸同痕癢呢d情況出現，最易令人唔舒服，所以秋季最好就系煲一d清潤湯水或者吃d新鮮梨最好！見阿仔早幾日間唔中有兩聲咳，我拿拿林去買d野煲湯俾佢飲，為免佢越咳越利犀利……呢個湯入面嘅南北杏，川貝，虎乳靈芝系有止咳化痰功效的，而沙參，玉竹，雪梨乾，雪耳則有潤膚潤肺嘅功效，就算無咳嗽人士都可以煲呢款湯水黎飲架，碗湯味道清清地微甜，飲落好舒服好潤，好好飲架！另外我睇報紙都見到有介紹入秋潤肺湯水，我影低佐，系呢度同大家分享吓！

老爺奶奶菜田，維記豬潤牛肉麵，星巴克咖啡

早幾日9月30日老公叫我同佢一齊陪老爺揸部車出去長沙灣放低俾人驗車，於是一早7點幾我同老公送完兩個小朋友返學之後就揸車出長沙灣，去到放低部車我地3個人去佐深水埗維記咖啡粉麵吃豬潤牛肉麵，我自己好喜歡吃呢間d豬潤牛肉麵，超足料，好正！吃飽之後去星巴克飲咖啡打發時間，11點左右已經收到電話話部車驗好，我地返去拎車再揸返部車返元朗菜田，我對上一次去奶奶菜田好似系1年前嘅事了，哈哈……今次菜田少佐好多菜，奶奶話之前打風搞到好多菜都唔要得，好幾塊田都再種過，我見有好多木瓜所以摘佐一個大嘅，老公話想食甘蔗，老爺就斬佐一條好大好粗嘅俾老公，條蔗好長好重仲好甜，但系佢d皮超硬，用牙咬唔到，一定要用刀批走d皮先食得我仲摘佐d指天椒同秋葵返屋企，奶奶仲俾佐一扎菜蕊我，收穫豐富，哈哈！

韓式泡菜餃子年糕鍋

早幾日系百佳買野滿50蚊就可以優惠價35蚊换3包灣仔碼頭韭菜蝦水餃，真系好抵，我换佐3包，系大昌見到阿囡鐘意食果款宗家府泡菜做特價30蚊一包，一包有500克，我又買佐一包，夜晚諗唔到煮咩食好，我見有泡菜同餃子唔諗咁多，一於黎個泡菜餃子鍋，仲俾我系冰箱揾到一細袋年糕片同半條鳴門卷，我又放埋落去一齊煲，哈哈…… 呢煲野真系快靚正之餘又好好味，洗好晒所有材料，煲滾水放晒所有材料落去煮15分鐘就食得，真系好方便！

香芋戚風蛋糕(附食譜)，日本紫皮黄肉蕃薯

前日老公叫我焗蕃薯俾佢食，我見净系焗小小蕃薯個焗爐仲有好多空位空佐出黎，我唔想浪費d空位，見廚櫃有一包香芋粉放佐系度好耐仲未用，包粉我系二德惠買的，一於動手整返個香芋戚風蛋糕放埋落爐一齊焗黎食，D日本蕃薯焗出黎好好食，好甜，但今次水份唔多比較粉同有小小乾，至於個香芋蛋糕個質感就好軟好濕潤好香椰汁味，之但系……無香芋味，有d失望，整體稗講都唔錯嘅，佢嘅外貌外形同顏色真系好靚，我好鐘意！

牛尾羅宋湯(附食譜)

羅宋湯我煲過好幾次，但加埋紅菜頭同牛尾一齊煲則系第一次，之前煲嘅羅宋湯我覺得無咁好飲，原來就系無加紅菜頭落去煲，今次嘅羅宋湯真系好正，好好飲，老公都話正！我話俾阿仔d媽咪聽用紅菜頭黎煲羅宋湯好正好好飲，跟住佢地就話睇相已經好正仲叫我教佢地煲，有d媽咪話驚我講佐第日到佢地自己煲果時唔記得又要再問我，索性叫我寫埋個食譜出黎俾佢，咁岩我又得閒，咁就寫佐出黎……順便系呢度分享吓我嘅做法^v^……喜歡的話可以跟著做希望大家喜歡~

豉汁豬頸肉豆卜蒸年糕，粟米咸蛋肉丸湯

天日就系中秋節喇……我兩個小朋友天日放假仲要系連放4日，哈哈…好爽~  唔知大家吃佐月餅未呢，我一早就吃佐喇……我提前系呢度祝大家：中秋節快樂，人月兩團圓！

自從上月去完澳門玩完返黎，我嘅體重上升佐唔小，系時候要吃返d清淡d嘅餸菜減返小小先至得之，今次簡簡單單蒸一碟餸，再滾一煲湯，咁又一餐……

榨菜木耳豬肉包

得閒無野做又玩下中式包，中式包做法比西式麵包簡單d快d，但唔知點解做咁多次都系做唔到我心目中要嘅效果，硬系爭d爭d，同系茶樓飲茶時食果d包總系差好遠，所以我每次做嘅份量唔多，做小小試佐先，好下次才做多d……我覺得做中式包好有難道…… -_-# 

節瓜雞腳猴頭菇豬骨湯

新一學年又開學了……之前放暑假放到個人都懶埋，好耐無煲湯飲，放親大假我多數一次過買幾日餸，免得日日要帶住2個小朋友去街市買餸，帶住佢地去街市買餸好鬼煩，系咁問我走得未買完未，煩死……呢款湯好清甜！

忌廉芝士焗薯茸

呢個暑假接近尾聲嚕……仲有2日呢個暑假就結束喇(╯з╰)……我要好好地享受埋呢2日，又系時候收拾心情準備開學喇……唉！真系唔想咁快放完暑假……一諗起每朝要6點幾就要起身整野返學整個人嘅心情自自然然低落起來，超級唔開心(>﹏<)

早兩日系吉豬島行街見到d美國焗薯做特價，4個大大隻先11蚊，見佢都幾抵，所以買佐2包，今日净系整佐1包4隻，仲有一包我諗住過幾日整炸薯角，呢個焗薯簡單好味，做法都算簡單，洗乾淨d焗薯一開二之後放入微波爐加熱至腍，再用匙羹不d薯仔肉出黎(要小心不薯茸，保留返個薯皮)，用匙羹壓爛，切d洋蔥粒煙肉粒炒香，然後加落薯茸入面，加小許食鹽和黑椒調味，最後加d芝士放面焗吓佢就食得，味道唔錯，我兩個小朋友好鐘意食！

涼瓜炒蛋，醬汁雞蚊薯仔

人大佐口味都會改變，我以前唔食涼瓜的，覺得好苦好甘，但依家又唔覺得話好苦，接受到，老公呢幾日成日叫我買涼瓜整炒蛋俾佢食，但我兩個小朋友系唔食涼瓜的，同我細個時一樣，哈哈…… 佢地唔食涼瓜炒蛋我就求求期期用d豉油雞粒炆薯仔俾佢地食，所以兩姐弟今晚净系得一碟豉油雞粒炆薯仔食

糯米糍(3款口味)……已更新！【附食譜】

昨晚整佐d糯米糍，咁岩老公放假所以今日我地一家大細拎d糯米糍過去婆婆屋企食，順便拎埋d澳門手信俾婆婆舅父阿姨佢地……今次d糯米糍我整佐3款口味，有例牌嘅花生味，今次加多佐2款口味，一款系奶黄餡另一款系紅豆粟子餡，紅豆栗子系烘焙店買嘅，而奶黄餡系自己整的，奶黄餡料食譜系烘焙店提供俾我的，我買紅豆餡時問店長有無現成奶黄佢話無，佢話其實奶黄好易整，店長話：不如我拎我個食譜俾你影低，你返屋企自己試吓整，我聽到後即答好同不停講唔該，哈哈……呢間店舖嘅店長真系好人……我整好d奶黄都有試味，我個人認為味道唔錯，等我屋企人試吃完奶黄糯米糍後，問吓佢地意見睇下好唔好味，味道如何，到時再報告俾大家聽……如果大家都喜歡咁我下次可以拎呢款奶黄餡試做冰皮月餅食餡……嘻嘻～ *^O^* 

香芋椰汁喳咋糖水，澳門之旅

今日下午無時做突然想飲糖水，於是落樓下買佐d香芋黎煲喳咋糖水，我系買現成一包包果d喳咋返屋企黎煲的，我第一次煲味道唔錯，做法又簡單，洗乾淨d豆加適量水就咁煲就ok……最後加埋椰汁攪匀咁就食喇！

早幾日過佐去澳門玩2日，時間過的真系太快，眨吓眼就話玩完……今次一家大細去玩感覺好特別好開心，但好攰……我最開心系可以睇水舞間表演，票價須然贵，但真系好好睇好，值得睇！至於我好期待嘅酒店自助餐就有些少失望，比我想像中差……另一開心事系一家人乘坐全球最高以及獨一無二嘅8字形摩天輪！

茅根馬蹄粟米牛蒡茶，一家大細過澳門

我放暑假放到就傻，點解咁講呢，就系我放親長假都唔會記今日系幾月幾號星期幾，老公問親我我都系答唔知……哈哈……呢排吃得熱氣野多，又系時候要煲返d清涼飲品幫助個身體清返毒素出黎，煲呢款牛蒡茶飲品清一清熱最岩……

暑假大多數系屋企玩，有時都會出去行吓街吃吓野，依家已經8月中了，放多2星期左右就要返學了……老公系6月尾同兩姐弟講如果佢地兩個最後一次考試成績達到爸爸要求就會同佢地過澳門玩，結果佢地兩個都達標，所有爸爸今日同佢地去澳門玩……

元朗正記，B記甜品，冒險樂園

上星期五老公放假帶佐我地去冒險樂園玩，玩完又帶我地去大排檔吃飯，爽……呢間正記我第一次黎吃咋，味道唔錯！我老公佢就好常系正記食宵夜同吃飯，佢d老友生日多數系正記食，最主要系佢開到好夜……所以佢地好鐘意去！老公極力推介呢度嘅炸蠔餅和蠔仔粥，佢地去親正記必叫的餸，而我就叫佐一碟口味蝦，好辣，但辣得黎好香好好味，阿囡揀佐手撕雞，味道一般，4個餸最差系手撕雞，蠔仔粥好鮮味好正，我第一次食咋！蠔餅即叫即炸好脆好香好好食，食完埋單300幾蚊都oK唔算太貴！吃完飯仲買埋B仔糖水俾我地返屋企慢慢嘆……抵錫＼(^e^)／

南北杏雪梨雪耳蘆薈糖水

太耐無煲蘆薈糖水，前幾日見到facebook顯示2年'前嘅當年今日我煲過呢款糖水，另到我又好想飲呢款糖水，於是打電話問奶奶依家仲有無種蘆薈，佢話有種，咁我就好唔客氣咁叫佐奶奶摘d俾我用黎煲糖水，哈哈……奶奶咁易話為我又點少得佢果份呀，我煲好佐糖水之後留起佐一半俾奶奶架，佢話太耐無飲呢款糖水都覺好正，仲話多謝我，我答佢你都傻嘅洗麥多謝，d蘆薈你摘俾我架，孝敬下你好應該㗎嘛！我呢個奶奶做人真系好開通開朗，完全唔會摆奶奶款，好識得為d仔女著想，我識得一d仔女同學仔嘅媽咪講佢地奶奶點樣唔好點樣煩討厭等等……我聽起都覺得煩，好彩我奶奶對我都好好，關係亦唔錯！  向來婆媳關係呢家野唔好起上黎真系好煩好激氣架m(._.)m 

酥皮榴槤批

昨日下午整佐呢個甜品，超級好味！焗果時成屋榴槤味好鬼正，吃果時好脆好香真系好鬼死正……呢d榴槤茸系老公買返黎嘅，即系上次整糯米糍果用剩果d，呢塊酥皮就勁囉，系好耐好耐之前應該年半前又或者系2年前都唔奇，系我之前買黎整杏仁條果時用剩架，哈哈……用剩摆佐系冰箱度一直無用，早2日執冰箱先記得有佢嘅存在！

做法簡單到小朋友都識整，因為全部材料都系現成野，净系切開酥皮加上饀料，之後用鐵叉將四邊位置壓實，咁就可以拎去焗，焗20分鐘左右就食得！

蒜味香辣南乳雞中翼，蒜茸炒菜蕊

印象中呢個南乳雞翼好似第一次整，之前應該無整過~ 雞翼呢款食材真系變化多端，但我黎黎去去都系整以下幾款多d，例如：豉油雞翼，滷水雞翼，瑞士雞翼，咖哩雞翼，蒜香雞翼等……今次就大膽試吓用南乳做醃料睇下味道如何，製成品我同2個小朋友都話掂，好惹味，系老公就話味道感覺一般，但佢又不停食喎，都唔知佢想點，真系俾佢吹漲…… -_-

香辣惹味菜脯(附食譜)，豬頸肉蒸粉絲

自從上次整過呢個辣菜脯食之後我就愛上佢，上次整得唔夠多，好快就俾我吃晒了，趁放暑假咁得閒我又再整……今次我要整多d整多d，放雪櫃慢慢食，用佢黎撈飯，撈麵食真系超正架！我同老公最喜歡用辣菜脯黎撈麵食，煮好個净麵加2匙羹辣菜脯再加小小甜豉油撈一撈即可以食得，咩餸都唔洗加已經好好味，簡單得黎好味又方便！阿囡見我話好正，佢自己都間唔中去雪櫃拎辣菜脯黎撈飯食……阿囡跟得我多越食越辣，今次呢個辣菜脯比上次嘅仲要辣，佢都食到，佢食完系不停飲水解辣架，哈哈……細佬對唔個辣菜脯喜歡程度則一般，因為佢唔系咁食得辣，小小辣佢就接受到，但我今次真系整得辣佐d嘅，我個人認為越辣越正！

蝦醬豆卜煎腩肉，咖哩薯仔炆雞翼

一排無買腩肉食，呢幾日突然想食又買黎吃，嘻嘻……我平時多數用南乳煎腩肉，但食得多都悶，今次轉用蝦醬黎煎，見冰箱吃剩小小豆卜我又掉埋落去，嘩……正到無朋友，d腩肉超惹味，d豆卜吸佐蝦醬已經好正，再俾我煎到脆卜卜，真系超正！我煎好碟腩肉再煮咖哩，系未開飯時老公已經入佐幾次廚房拎d腩肉食，我真系頂佢唔順，成個小朋友咁不停走去廚房拎腩肉食，佢話真系好正，忍唔到口喎，今次煮嘅咖哩好香，因為我加佐小小淡忌廉落去煮，阿囡話好似系街食果d咖哩……d汁用黎撈飯真系好好味！