鮮百合紅腰豆蔬果沙律，尖沙咀出名熊仔曲奇，杭州特產

上兩個星期整嘅沙律，依家先得閒整理好post出黎，無辦法家庭主婦系比較忙，唔忙果時又唔願郁，有時間我盡可能都系休息，訓訓訓……哈哈……我第一次用百合整沙律，口感都幾特別，爽甜，今次嘅沙律無加罐頭雜果落去感覺健康好多，無咁甜，用佐紅腰豆，蘋果，青瓜，百合，薯仔，感覺好清新，唔錯唔錯(^_-) 

黑豆蓮藕章魚豬骨湯，辣豆板肥牛魚條炒韮菜花，煎荷包蛋

呢款湯我原本系要用綠豆黎煲嘅，之但系我買餸菜果時唔記得買綠豆，但系屋企俾我搵到一袋仔黑豆，所以就用黑豆代替綠豆喇，其實黑豆功效都好好架，好似系補腎架，實際功效我唔記得喇，要知就自己上網或睇書查下資料喇，嘻嘻……再簡單d就煎2隻蛋同炒碟韮菜花咁又一餐了！

菜脯肉碎炒豆乾粒，蒜蓉豆豉蒸䱽魚，白灼菜蕊

攰攰地唔想將d菜脯用機攪碎，貪方便切粗粒就算，哈哈……整碟餸嘅效果不及上次，上次全部都系用機攪碎，但今次就求求其其切粒粒所以整體感覺都系無上次咁好食(︶︹︺)……事實證明唔可以懶，嘻嘻~  下次一定要攪碎先得，攪碎先至好食d～  兩姐弟將成條䱽魚吃晒，好勁哦！我一啖魚都無食，净系吃碟菜脯同菜已經夠飽了……因為我唔多鐘意食魚 (=^e^=)

糖不甩，芒果肠粉，雪糕紫米小丸仔

婚後第一次整糖不甩，我結佐婚9年喇，哈哈……時間過得真系快，我唔經唔覺做佐9年家庭主婦，呢份工真系唔易做，少d體力勞動力及智力都死，婚後頭3年同奶奶同住時我已經系家庭主婦了，只系唔洗我買餸，老爺奶奶負責買餸同間唔中幫忙湊小朋友，我就負責煮煮煮，做家務同湊小朋友，好處系我間唔中可以休息下同蛇皇去行吓街，自從同奶奶分開住更加唔洗我多講，直頭系我自己掌管一切(一腳踢，做到頭都痕埋)，全日24小時on call任勞任怨，屋企大小二事都系我自己一個人搞掂……我有時真系服佐我自己，做到死死吓病病吓都系會繼續做，有時真系覺得自己系鐵造的，嘻嘻……日做夜做需則系辛苦，但我見到老公同一對仔女每日都健健康康咁過著每一日，而我煮嘅野佢地都食得好開心，作為老婆同媽咪嘅我，只要見到佢地開心，就算要我做幾咁辛苦嘅工作我都好樂意去做，幾辛苦都系值得嘅！

羅漢果夏桑菊涼茶，甜菊葉

細佬呢排吃得熱氣食物多，朝早起身見佢有小小眼膠，為免越黎越嚴重所以拿拿淋煲d清佐夏枯草涼茶俾佢飲，上次買胎菊時老闆介紹我用甜菊葉，佢話呢d葉好得意的，有自己嘅甜味，如果煲菊花茶想要甜味但唔想加太多冰糖或片糖，可以試下加呢款甜菊葉，煲一煲放小小已經有甜味，我開頭都系半信半疑啲，佢就呢d葉唔貴，可以買10蚊試下先，於是我就買佐10蚊試吓，結果又真系幾好喎！唔錯……

多寶魚，辣汁蒸滑豆腐，西洋菜

我第一次買多寶魚蒸黎食，唔知系我蒸得過火得制還是條魚d本身問題，我覺得呢款魚肉質比較硬同實，唔滑，同埋我想講多寶的皮好核突，表面層皮凸凹不平的，好似生佐好多蒼咁，洗魚果時洗到我起雞皮(╯▽╰)……老公話想食百福滑豆腐，所以我就清蒸之後加甜豉油同辣椒油拌勻即可以吃，簡單好味！

欖菜肉碎年糕炒四季豆，七味黑椒牛扒，土伏伶牛旁粟米茶

細佬上月底無啦啦身痕，開頭都唔覺有咩問題，之後過一星細佬話越黎越痕，痕咁耐我覺得唔對路所以同佢去睇醫生，醫生話佢系皮膚過敏同濕疹，俾佐一星期藥同d藥膏及冲涼沐浴油細佬，咁樣睇一睇醫生就要400蚊，唉……真系攞命(╯з╰)  為佐想细佬d皮膚快d好唔痕，煲佐土伏伶牛旁粟米水俾佢飲，飲佐2日又真系好佐好多，依家細佬無晒事，好番晒了！

雪梨雪耳椰子雞腳脊骨湯，蕃茄雜丸湯米線，煎釀魚肉尖椒

呢排d天氣真系搞死人，前排日日熱到標汗之後又無啦啦黎個紅色雷暴警告昨日又出晒太陽晒到你傻，呢d天氣大家真系要小心身體！一排無煲湯就整返煲清潤湯潤一潤先……天氣唔想食飯，老公話想食米線，所以就煲佐呢個蕃茄雜丸湯米線，再加一碟釀尖椒，掂晒！

辣菜脯(附食譜)，豉汁腩肉蒸年糕，菜蕊，紅雨停課

今日我真系俾教育局玩死，宣布停課嘅時間唔三唔四咁，系諗住停課嘅就應該一發出紅雨時就同時話停課喇，系要等到發出紅雨後再遲多10分鐘先話停課，宣布時間真系超早的間介，我地40分已經要出門，(因為8:15已經要返到學校上堂)，出門果時新聞仲未話停課，去到巴士站上埋車先收到其他同學媽咪通知話停課，唔洗返學，唯有中途落車帶住2個小朋友行去街市買餸再返屋企，落住雨要湊返學真系超狼狽，我一個人揹住2個書包又要擔住一把大遮遮細佬，見姐姐大個小小就叫佢自己擔遮，我一個女人仔得一對手真系能力有限，我最憎就系落雨送返學同接放學，真系超討厭！

豬頸肉露筍炒鮮百合，餐肉炒蛋，鮮百合雪梨乾清補涼糖水

街市呢排有好多新鮮百合賣，又唔系話好貴，所以買返幾包返屋企炒黎吃，我上星期出元朗買餸見20蚊有4包，我呢度一大碟都系用佐2包咋，我自己幾鐘意食，鮮百合吃落系好爽甜的，但我兩個小朋友就唔系好喜歡，阿囡話d百合有怪味喎，俾佢吹漲！今日我仲拎佐一包用黎煲清補涼糖水添，好正！如果煲糖水的話一定要後下，等糖水煲好時最後放落去滾兩滾要即刻熄火，否則d鮮百合會煲到爛晒或是溶埋！呢一點真系要注意下……

尖椒皮蛋滑豆腐，豆卜蝦米炒娃娃菜，臘腸蒸銀魚仔，煎蓮藕肉餅

昨晚餐飯好似多佐d，4個人整佐4碟餸，但都清得八八九九……老公開頭話我蒸d銀魚仔好臭，點知吃飯時佢自己就不停食，真系衰，4碟中好在其中兩碟系細碟黎嘅，昨晚d餸碟碟都好正，最正系碟皮蛋豆腐，皮蛋系老公買返黎的，19蚊一盒仔其實都有小小貴，但我又好鐘意佢d汁，可惜我自己唔識得整呢個醬汁，我去親譚仔吃野例牌會叫呢個尖椒皮蛋架，我無辣不歡的……嘻嘻~

豉油皇豬扒，菜蕊，上海姥姥

上星期三老公放假，中午同老爺奶奶姑奶一齊去頌富新開嘅上海店吃野，其實上星期我兩公婆同姑奶已經試佐一次，覺得味道唔錯，所以是次帶埋老爺奶奶一齊吃，中午吃得太豐富了，所以夜晚我都唔整咁多餸，净系整一碟豉油皇豬扒同灼返碟菜蕊就算了，夜晚我都無吃飯只系吃佐幾條菜，哈哈……