辣菜脯(附食譜)，豉汁腩肉蒸年糕，菜蕊，紅雨停課

今日我真系俾教育局玩死，宣布停課嘅時間唔三唔四咁，系諗住停課嘅就應該一發出紅雨時就同時話停課喇，系要等到發出紅雨後再遲多10分鐘先話停課，宣布時間真系超早的間介，我地40分已經要出門，(因為8:15已經要返到學校上堂)，出門果時新聞仲未話停課，去到巴士站上埋車先收到其他同學媽咪通知話停課，唔洗返學，唯有中途落車帶住2個小朋友行去街市買餸再返屋企，落住雨要湊返學真系超狼狽，我一個人揹住2個書包又要擔住一把大遮遮細佬，見姐姐大個小小就叫佢自己擔遮，我一個女人仔得一對手真系能力有限，我最憎就系落雨送返學同接放學，真系超討厭！

今晚整佐一碟超惹味餸就系辣菜脯，老公話超正辣得好過隱！見我整好之後佢試食完話好好食，之後就自己拎煲煮麵再拎d辣菜脯黎撈麵食，佢話撈麵真系超好味喎，哈哈……另外驚辣菜脯太辣，兩小朋友吃唔到，所以拎佐細半碟辣菜脯加佐一d肉碎同豆乾粒一齊再炒下佢，等d肉味同豆乾味中和下d辣味，炒完之後無原先咁辣，所以佢兩個就吃到，兩姐弟話用黎撈飯食好好味！

【辣菜脯】食譜

材料：菜脯1碗，小蝦米半碗，乾指天椒4隻，大乾蔥頭8粒，蒜頭5粒，油適量

調味料：食鹽，糖

做法：1---菜脯浸洗乾淨，乾蔥，蒜頭，指天椒全部用機攪碎(無機可用刀人手剁)

2---將油落鑊燒熱，加乾蔥碎蒜頭碎爆香再加指天椒炒香之後再加小蝦米炒到聞到香味，最後加埋菜脯碎及調味料不停炒，炒至菜脯粒乾身為止，便完成了！

溫馨提示：每個街市賣的菜脯咸甜度都不一樣，要自行試味以及調味！喜歡辣d就自己加多d指天椒乾便可以！

＊炒呢個菜脯要放多小小油，太小油炒出黎系無咁好味架，如果即日食唔晒的話，就用個乾淨玻璃盒或闊口玻璃樽裝好放雪櫃保存即可了，用佢黎撈麵或者撈飯吃真系好正好惹味架！