香椿菜火腿炒蛋

 🤪我真系大鄉里出城🙈人生中第一次買同第一次食😅😅買菜時見到呢d唔知道系乜東東🙄 於是問菜檔阿姨，佢話呢個系香椿呀8蚊1扎，功效好好架，唔系成日有的賣，你買扎返去试吓 之但系……我同菜檔阿姨講我從未試過呢d香椿喎，佢d葉紅色嘅系咩味道架，菜檔阿姨話系有香味嘅，好好食架，你買1扎返去試試，返去拖一拖水之後切碎用黎炒蛋，好香架! 我拖水時覺得d味道一般怕唔好食，於是去雪櫃拎兩塊火腿切碎佢放埋落去炒😆，炒蛋有火腿咁點都唔會難食得去邊度喇呱🤣🤣……食完之後我又唔覺得d香椿好香喎，哈哈~ ~ 一試無防🤭

章魚丸子海鮮忌廉芝士白汁螺絲粉

成日煮飯食，食飯食到悶悶地簡簡單單系超市買罐金寶湯意粉醬咁樣整個白汁螺絲粉食，加埋一d自己喜歡嘅材料落去，系咁煮一煮佢，真系好好味，好味過出街買果d白汁意粉，餐廳買果d白汁意粉有時貴得黎系超唔好食，真系好好食果d又好鬼貴喎!

土伏伶粉葛去濕湯，XO帶子炒西蘭花，手撕雞

 近日濕氣比較重……琴日朝早濕度好高有90%，令到整個人的身體容易攰和很易皮膚痕癢今日放假要煲返一煲去濕毒嘅湯水黎飲一飲，要趕走晒身體嘅濕氣同毒素先得，為佐增強去濕效果我額外加佐生熟薏米同花豆，花豆去濕功效好好!

👩‍🍳今次煲湯材料有以下呢d ⇒ 生熟薏米，赤小豆，扁豆，花豆，蜜棗，陳皮，新鮮土伏伶，鑽地老鼠，粉葛，豬踭肉

🫕豬踭肉和土伏伶，鑽地老鼠要拖一拖水，之後將所有材料洗乾淨，加水煲2~3小時，加食鹽調味即可 !

鎐柱滑雞粥

 太耐無煲粥食，見有雞系雪櫃度一於拎半邊雞出黎即時煲粥做早餐食，阿仔同阿女唔食粥，所以今次煲得唔多粥，半煲就够晒我兩公婆食，因突然話煲粥關係所以無買油炸鬼，牛脷酥同炒麵，净系食粥就算，仲要系一人兩大碗，哈哈~ ~ 系咪覺得好誇張呢，真系一d都唔誇張架，我同老公真系一人食佐2大碗，我兩個真系好喜歡食粥架 ! 食完果吓真系好滿足同好飽，去完兩次廁所之後………好快又肚餓，因粥系易消化d !

鎐柱滑雞粥

酸辣湯，迷你馬蹄魚肉炒韭菜花，榨菜蒸脢頭豬肉

 🥣第一次煮👉酸辣湯😋………味道還可以😜 但系…🤫吃佐一半先至發現我唔記得佐放雞蛋落去😅~   😂即刻搬返入去加返隻🥚蛋先~~🤣 無得唔認自己年紀大，真系越來越無記性， 想唔認老都唔得喇~ 😄

雙菇雲耳蒸滑雞(附食譜)

我大大話有年幾2年無用雲耳蒸過雞喇，前排系新北江買佐隻冰鮮黄油雞， 呢款黄油雞嘅肉質好好食，佢d肉唔系腍啤啤架，食落口好有咬口，系走地雞嘅質感，食落口完全系新鮮雞嘅質感好有雞味同甜味，推廣價55蚊一隻好抵食 ，果度嘅老闆話貨量唔多，賣晒就無，我有一次去買好早已經話賣晒，我今次系第二次去幫襯佢，今次一買就去買，仲買佐2隻添，一隻系老闆推介嘅黄油雞，已買過黎食好食再買，另一隻系麻香雞(老闆話呢款肉質更好)，今次系用黄油雞，用佐半邊黎蒸，已經有一大碟喇，老公話好好食，其實上次買黎煮咖哩同煮雞酒，試過質地好好，所以今次用佢黎蒸，哈哈 ~ ~ 好好食 ! 

香脆格仔餅

 買佐呢包韓國熱香餅粉都好耐了，放系廚櫃一直無整，琴日放假執廚房櫃見到包粉，拎佢出黎玩吓，首次自制格仔餅，即整即食好正，脆卜卜 ，第一次玩呢個格仔餅模，好玩~ 又好食， 仲有一個模未試，冬甩模……下次拎佢出黎玩， 呢部機有3個模架，細細部機仔，唔阻地方，易收藏幾好，雙11時我系淘寶買的，100蚊左右好抵玩，哈哈 !