糯米糍(3款口味)……已更新！【附食譜】

昨晚整佐d糯米糍，咁岩老公放假所以今日我地一家大細拎d糯米糍過去婆婆屋企食，順便拎埋d澳門手信俾婆婆舅父阿姨佢地……今次d糯米糍我整佐3款口味，有例牌嘅花生味，今次加多佐2款口味，一款系奶黄餡另一款系紅豆粟子餡，紅豆栗子系烘焙店買嘅，而奶黄餡系自己整的，奶黄餡料食譜系烘焙店提供俾我的，我買紅豆餡時問店長有無現成奶黄佢話無，佢話其實奶黄好易整，店長話：不如我拎我個食譜俾你影低，你返屋企自己試吓整，我聽到後即答好同不停講唔該，哈哈……呢間店舖嘅店長真系好人……我整好d奶黄都有試味，我個人認為味道唔錯，等我屋企人試吃完奶黄糯米糍後，問吓佢地意見睇下好唔好味，味道如何，到時再報告俾大家聽……如果大家都喜歡咁我下次可以拎呢款奶黄餡試做冰皮月餅食餡……嘻嘻～ *^O^* 

澳門手信

在場所有人都食過d糯米糍，個個都話2款新口味都好食，講到最受歡迎一定系原味花生芝麻椰絲餡，原味真系無得輸…………哈哈！我問過大家意見今次嘅糯米糍皮好還是上次的好，佢地意見系上次d皮系軟滑d造型無今次咁好，今次呢d糯米糍皮煙韌d香d，大家話兩款皮都好好食，只系口感唔同，味道大致一樣！ 兩次糯米糍皮唔同系因為做法有些少唔同，上次系所有材料撈匀就蒸50分鐘左右，今次做法系將水份的材料煲滾撞落d亁粉上，再撈勻之後蒸20分鐘，分別在於呢度，其餘材料大致相同！

烘焙店舖提供俾我的食譜
在此再次謝謝SWEET CC烘焙店

糯米糍食譜：(份量30粒)

材料：
1：糯米粉280克，粘米粉30克，澄麵粉20克
2：砂糖160克，鮮奶400克，椰汁400克，粟米油2湯匙
3：椰絲，熟糯米粉(白鑊炒)

做法：
1：將材料1所有粉類過篩
2：將鮮奶和砂糖用小火將糖煮溶，加入椰汁和粟米油煮滾，然後快手倒落材料1以及快手撈匀至粉糰狀態
3：將粉糰放在已塗油的碟上隔水蒸20分鐘至熟，粉糰蒸熟後放凉放入密實袋用手不停搓揉(增加煙韌度，可選擇唔搓揉的)
4：最後放雪30分鐘(雪過的粉糰無咁黐手)取出分割自己喜歡的大小粉糰，壓扁粉糰包上餡料收口即可

※ 包餡時帶上即棄透明手套會容易d包，否則好黐手