百香果戚風蛋糕(附食譜)

琴日新玩具到手……即玩整蛋糕，廚房仲有3個已經巢晒皮嘅百香果放系度，一於整百香果戚風蛋糕，我覺得制成品好靚仔，點知……兩姐弟話唔好食……佢地話我放得太多百香果汁，佢唔喜歡果陣味喎，叫我自已食晒佢，唉…… 一睇兩姐弟食呢個蛋糕個張相嘅樣就知……佢兩個有幾咁唔鐘意食，哈哈 ! 佢兩個叫我以後唔好整呢個百香果戚風俾佢地食，要整百香果就只可以整返早幾日果款百香果牛油蛋糕仔! 我問佢地點解唔好食？佢兩個話個戚風蛋糕有d酸，唔好味，而百香果牛油蛋糕仔唔酸，有牛油味香d好味d喎 !

呢個焗得好靚!

加佐果核制成品無咁靚
有好多窿窿😔

今次真系大件事喇，兩姐弟每人吃佐少少就話唔食，叫我自已食晒佢，而我老公話對百香果無興趣話唔食，2個6吋蛋糕我一個人咪有排食，唉，點算，我平時過鐘意整多過鐘意食，正所謂少食多滋味呀嘛(^o^) 見有咁多蛋糕系度，我又唔想食咁多。於是我就大膽問阿仔嘅同學仔媽咪有無興趣食，點知佢地幾個人都話好，我真系好多謝佢地，幫我手清一清d蛋糕，唔洗我自已食咁多，我净系留返2片俾自已，其餘分晒俾同學仔媽咪食……嘻嘻 (*∩_∩*)

# 今朝我拎佐d蛋糕俾同學仔媽咪食，我叫佢地食完俾d意見我，佢地嘅意見系: 兩款蛋糕都好軟熟，蛋糕質感好好，好味過街買果d，佢地話唔系好酸，只系輕微酸，大人食接受到，如果俾小朋友食就要甜返小小味道可能會更加岩小朋友食! 佢地話有核果款蛋糕食落口好得意咬落口有卜卜聲同埋百香果味濃d比較好食，而無核嘅蛋糕就清香d蛋糕質地比有核嘅較軟同較綿 !

百香果戚風蛋糕

 (份量 : 6吋2個)

材料 :

 蛋白6隻，砂糖90克，蛋黄6隻

百香果汁60克(3個)，粟米油30克，低粉100克

做法 :

1. 蛋白用電動打蛋器打起大泡後分3次加入糖打至光滑
2. 蛋黃+百香果汁+粟米油拌勻加入低粉攪至無粉粒及幼滑
3. 將蛋白霜分3~4次興麵糊以切拌方法拌匀
4. 預熱焗爐，170度焗30分鐘

# 此食譜為少甜版本，制成品味道系有小小酸嘅，如喜歡甜d請自行增加砂糖份量，百香果本身都系好酸，甜酸度要自行調教 ! 

♡我嘅新玩具♡