冬菇紅棗杞子雲耳蒸雞，上湯灼白菜，豬扒

 唉……放假嘅時候習慣佐夜訓，朝早訓到成10點先起身，今晚又系一樣夜訓，其實我一早已經系床度但訓唔著，唯有拎電話訓系床度睇電視，睇完電視依家就寫吓野，寫完真系要訓因為明天要送小朋友返學，之後又要送飯盒俾兩姐弟真系有排忙，諗起都煩，想繼續放假……哈哈！下午4點幾突然想食糖水，咁岩上星期婆婆俾佐個細芋頭我，反正屋企有椰汁同西米，一於整反煲返个糖水食吓先……(^_-)開始眼訓了，要快d去訓……早抖！

紅蘿蔔粟米合掌瓜雞腳湯，焗糖醋骨，辣肉腸蕃茄炒蛋

第一次買合掌瓜黎煲湯，原來煲出黎d湯都幾清甜，我仲記得第一次吃合掌瓜果時系結婚無耐同奶奶一齊住嘅時候食的，佢買黎炒肉片，我吃佐2塊已經唔鐘意食，當時我系唔知果d叫合掌瓜架，因為我結婚前我無見過我媽買黎食，所以我唔識(^_-)……今次又搞搞新意，將煮糖醋骨的汁料同金沙骨撈匀放雪櫃醃一晚，第二日用焗嘅方法黎整，效果好好，好入味，呢個方法真系唔錯，將已醃好嘅糖醋骨放落焗盤200度焗熟即可以，真系方便，快靚正！

香辣肥牛年糕炒椰菜，金菇牛肉卷，瑞士汁雞翼，腐竹蛋糖水

早幾日阿女無啦啦同我講話想食年糕，我就買佐一包細嘅俾佢食，年糕本身系一d味都無嘅，系要靠d汁俾味佢的，我自己多數系蒸排骨果時用年糕墊底，咁d年糕就會吸佐d汁咁就會好好味，但今次試下放埋落菜入面一齊炒，比我想像中好食！

開心復活節@ 沙田，尖沙咀，長洲

足足2個星期嘅復活節假期話咁快就過佐大半了，仲有3日就結束……呢個假期過得好愉快，不停同兩個小朋友去玩，佢地就好開心我就好攰，做家長系咁㗎喇，無辦法～放咁多日假無可能日日留系屋企，放假頭一星期成日落雨陰天潮濕，煩到爆～難得呢個星期好天我地一於要玩盡佢，27號約佐同學仔去沙田snoopy公園玩同埋行街吃野，休息佐1日……再去玩，29號約佐大表哥去尖沙咀買鞋同行街，之後第二日又1家4口去長洲玩，4月1日又去佐姑媽屋企玩，玩足成個星期咁制，真系開心！

3月27日(沙田snoopy公園)

一家四口打邊爐

上兩星期我地一家大細系屋企打邊爐，自從同奶奶分開住之後我地都極小系屋企打邊爐，今次應該系第二次，我仲記得第一打邊爐系廚房用煮食煤氣爐黎打，因為當時無電磁爐，局住要系廚房所以好少打邊爐，今次呢個爐系奶奶俾的，有佐爐方便d囉！今次用麻辣湯打邊爐好正，辣辣地好惹味，真系估佢唔到，兩姐弟竟然食到辣，勁呀，哈哈……開頭我諗住烚佐小小丸同菜俾佢兩個先，但佢兩個竟然話我想試食麻辣湯，所以我净系落半包，如果落晒一包我驚太辣食唔到，但落半包已經好够味好正，呢包麻辣湯包系老公同事俾我地的(^_-)

南北杏西洋菜鴨腎湯，蒜茸腐乳生菜，香煎鯖魚

一排無煲湯，諗唔到煲咩湯就拎佐嫲嫲俾嘅西洋菜同紅蘿蔔黎煲，簡單好飲，生菜都系奶奶俾嘅，今日所有嘅菜都系奶奶自己種的，紅蘿蔔仔咪睇佢細細條但佢俾街市買果d甜好多架，之後就系冰箱揾出3條鯖魚出黎解凍，用小小鹽同胡椒粉醃一陣，兩面煎香就食得，食鯖魚時加小小檸汁落甜豉油度拌匀來點鯖魚食，特別正架！

冬菇臘味糯米飯

每年冬天我例牌會煮糯米飯食的，我地一家大細都喜歡食，我最唔鐘意系街買嘅糯米飯黎食，因為超級多油，每次食完d糯米飯你就會見到個碗底多油到嚇死人，所以我喜歡自己煲糯米飯食嘅原因就系咁樣！我自己系屋企煮系將d臘腸臘肉先飛水再切粒之後仲會用平底鑊炒香等炒出佐d油份出黎唔要d油，再加蝦米乾蔥碎一齊炒香先至放系米上面最後加埋冬菇放系米上面一齊煲，跳製後加豉油調味即可，自己煲盡量少油，咁樣就會健康d，我自己喜歡用2份粘米加1份糯米溝埋一齊煲的，我覺得咁樣好食d，净糯米我覺得唔好～哈哈！

麵豉湯稻庭烏冬

每逢星期六日我都系好簡單咁煮就算，因為老公返夜，得返我同兩個小朋友吃，所以盡量簡單，哈哈……一煲過快靚正，唔洗煩果吓先正呀嘛！

腩肉豆乾泡菜炒粉絲，黑椒雞扒，白灼菜心

早幾日行759見有正價7折，我平時好小系759買冷凍食品的，今次見到d火腿同泡菜折佐之後都系15蚊左右，我見都幾抵吓，所以買黎試吓，今日試佐泡菜比較酸，我平時多數都系買韓國宗家府泡菜的，味道比較好一d，酸辣度都好岩我食(^_-)  今晚就系用759買嘅泡菜用黎整餸，用佐腩肉同豆乾一齊煮最後加埋屋企用剩嘅小小粉絲煮一煮，因今次d泡菜比較酸所以要加多小小糖落去中和吓d酸味，d粉絲吸收晒d汁多正，好好味，今晚阿女同老公爭食粉絲，哈哈……

數字骨(附食譜)，香煎三文魚，白灼菜心

數字骨呢味餸我第二次整，味道我同老公都覺得好好味，第一次唔成功我整到好黑，哈哈，黑到嚇死人，你見到張相就知有幾黑架喇，嘻嘻！第一次用電飯煲整排骨，整到d排骨黑蚊蚊，第二次則轉用煲仔用明火煮，效果好好，數字骨食譜系同學仔媽咪俾我的！